Со одржувањето на инфо денот Центарот за развој на ЈИПР ја означи успешната имплементација на проектот „ХЕЛП“

Центарот за развој на ЈИПР во изминатите неколку години интензивно работеше кон обезбедување на современа инфраструктура и опрема за управување со кризи која всушност беше главната цел на проектот “Интегриран оперативен центар за хуманитарна помош – ХЕЛП“.

Имплементираните активности и постигнатите резултати од проектот се презентираа на инфо денот кој се организираше на 26 октомври 2021 година и кој настан всушност ја означи успешната имплементација на проектот „ХЕЛП“.

Една од главните активности по проектот беше набавка и поставување на Команден центар опремен со најсовремена опрема која ќе овозможи зголемена одговорност, брзо реагирање, современи методи и координација на човечките ресурси во процесот на справувањето со кризи кој е сложен процес и бара вклученост на сите надлежни институции, како на регионално така и на национално ниво.

Во рамките на проектот беа подготвени и постери со инструкции за тоа како да се реагира во услови на пожар и земјотрес и истите беа дистрибуирани низ општините, сите основни и средни училишта, како и низ други јавни згради во Југоисточниот регион.

Исто така беа подготвени и национални и прекугранични протоколи за комуникација, соработка и координација и Планови за управување со кризи за целиот Југоисточен регион кои ќе овозможат да се има однапред утврдени јасни инструкции за тоа што треба да се направи и каков процес треба да се следи, бидејќи во услови на кризи навремената акција е најбитна, а управувањето со времето е многу важно.

Официјално проектот завршува на 31 октомври 2021 година, а истиот е финасиран од Европска Унија и Националните Фондови на земјите учеснички преку Интеррег ИПА Програмата за прекугранична соработка помеѓу Грција – Република Северна Македонија 2014-2020.

Од  21-24 октомври, 2021 година дел од тимот на Центарот за развој на Југоисточниот плански регион, предводен од Директорката Г-а Жулиета Ѓуркова присуствуваа на седмиот Регионален Самит за Претприемништво за доделување на наградата „Stvaratelji za stoljeca“ кој се одржа во Дубровник, Р.Хрватска.

На оваа манифестација на Г-а Ѓуркова, како Директорка на ЦРЈИПР и беше врачена една од најпрестижните награди и признанија во Југоисточна Европа, на која беа доделени  награди на најзаслужни личности, организации и инстистуции чија посветена работа придонесува за развој на претприемништвото и економијата во Средна и Југоисточна Европа.

Наградата „Stvaratelji za Stoljeca“ е еден вид претприемнички Оскар и се доделува само на големите визионери и лидери на утрешнината чија бестрашност, работа, знаење, креативност и врвни резултати се темел и главен двигател на напредокот на заедницата.

Признанието е потврда за уникатноста на стратегијата и способноста на Центарот да креира долгорочен и здрав раст, фокусиран на безрезервна поддршка на бизнис заедницата. Во тоа светло Центарот го гради своето реноме: секогаш отворени за соработка, иновативни и уникатни. Како во изминативе 13 години, така и во иднина фокусот на нашиот тим ќе биде насочен кон спроведување на активности и проeкти за  подобрување на квалитетот на живеење на сите граѓани. Оваа награда е само потврда дека сме на вистинскиот пат. – истакна Г-а Ѓуркова на самитот “300 Најдобри”.

Целта на оваа награда е јавно да им се даде признание на најдобрите со цел да ги препознае пошироката јавност, кои во овие динамични времиња со оригинални решенија и креативност го унапредуваат животот во зедницата и претприемаштвото.

Со добивањето на оваа престижна награда и признание за придонес во развојот на претприемаштвото и економијата, Директорката на Центарот за развој на ЈИПР, Г-а Жулиета Ѓуркова е назначена и за член на Меѓународниот комитет за доделување на награди.

Оваа награда им припаѓа на сите кои веруваат во внатрешните капацитети на Центарот, кои со голема доверба и лојалност ни ги доверуваа сите проекти кои ние ги реализиравме  во текот на овие 13 години. Голема е одговорноста која ни е дадена и со сета наша волја, сила и желба да го подобриме животот на сите околу нас продолжуваме  во остварување на оваа голема визија.