Претставници од Центарот за развој на Југоисточниот плански регион учествуваа на 3-от Генерален состанок на проектот SEBCoVE во Шпанија

Претставници од Центарот за развој на Југоисточниот плански регион учествуваа на 3-от Генерален состанок на проектот SEBCoVE – Smart Electricity for Buildings – Centres of Vocational Excellence, кој се одржа на 12 и 13 мај 2026 година во Сан Себастијан/Доностија, Баскија (Шпанија) во рамки на програмата Erasmus+.

Дводневниот состанок обедини партнери од повеќе европски земји, со цел следење на напредокот на проектот, координација на тековните активности и планирање на следните чекори за развој на центрите за стручно образование и извонредност во областа на паметни електрични системи и енергетска ефикасност на објекти.

Во текот на првиот работен ден беа презентирани активностите од Работниот пакет 4, кој се однесува на развојот на SEBCoVE центрите, при што се дискутираше за креирање професионални профили, развој на дигитални наставни програми и материјали за обука, воведување на иновативни методи за учење, дигитални алатки, augmented reality апликации, како и модели за соработка и финансиска одржливост на центрите.

Дополнително, партнерите разговараа за имплементацијата на обуките и процесот на сертификација на учесниците во рамки на Работниот пакет 5, како и за воспоставување на системи за квалитет согласно ISO 21001 и EQAVET стандардите. Беа презентирани и активности поврзани со мониторинг, евалуација, интерни ревизии и механизми за следење на квалитетот на проектните активности.

Во рамки на вториот работен ден се одржаа дискусии за управување со проектот, административна и финансиска координација, напредокот на проектното известување и одржливоста на резултатите. Особено внимание беше посветено на дисеминацијата и комуникацијата на проектот, организацијата на настани и семинари, продукција на промотивно видео, како и вмрежување со други европски иницијативи и проекти.

Учесниците имаа можност да посетат и интегриран центар за стручно образование и обука во Усурбил, каде беа презентирани добри практики и современи пристапи во стручното образование.

Проектот SEBCoVE има за цел да придонесе кон унапредување на стручното образование, развој на современи вештини и зајакнување на соработката помеѓу образовните институции, компаниите и организациите во секторот на паметна електрична енергија и одржливи технологии.