Од климатски предизвици до локални решенија – Одржана третата G4G работилница во Гевгелија

На 12 ноември 2026 година, во G4G центарот во Гевгелија, се одржа третата работилница во рамки на проектот „Зелено за добро“ (G4G), на тема „Локален развој отпорен на климатски промени“. Работилницата беше организирана од проектниот партнер CISS, со учество на претставници од локалните институции, проектните партнери и други засегнати страни.

Како климатските предизвици да се претворат во можности за одржлив локален развој? Ова беше главното прашање на работилницата, која ги поврза европските климатски политики со конкретни решенија применливи на локално ниво во прекуграничниот регион.

Проф. д-р Страхиња Трпевски ги претстави европските стратегии и цели до 2030 година, со посебен осврт на пет меѓусебно поврзани области: обновлива енергија, управување со води, шумарство, земјоделство и туризам.

Преку практични примери беа разгледани можностите за подобрување на енергетската ефикасност на јавните објекти, користење соларна енергија и дигитални алатки за енергетско планирање. Посебно внимание беше посветено и на одржливото управување со водните ресурси, заштитата на шумите од пожари, климатски отпорното земјоделство и приспособувањето на туристичките дестинации кон климатските промени.

Од идеи до конкретни предлози

Интерактивниот дел им овозможи на учесниците заеднички да идентификуваат приоритети и да предложат можни решенија за локалните климатски предизвици. Меѓу разгледаните идеи беа подобар мониторинг на водите, превенција од шумски пожари, поефикасно користење на ресурсите во земјоделството, циркуларна економија и одржлив и пристапен туризам.

Дискусијата ги опфати и главните пречки за реализација – финансиски средства, застарена инфраструктура, административни процедури и потреба од подобра координација меѓу институциите.

Практичниот дел беше дополнет со две теренски посети, каде што учесниците имаа можност да се запознаат со конкретни примери од областа на управувањето со води и обновливата енергија.

Работилницата уште еднаш ја потврди важноста на соработката меѓу општините, јавните институции и другите локални чинители за развој на практични, одржливи и климатски отпорни решенија.

Проектот „Зелено за добро“ (G4G) се имплементира во рамки на Интеррег VI-A ИПА Програмата Грција – Северна Македонија 2021–2027 и е кофинансиран од Европската Унија и националните фондови на земјите учеснички.

 

Центарот за развој на Југоисточниот плански регион со промотивен штанд на AGRO EXPO 2026 во Скопје

Центарот за развој на Југоисточниот плански регион (ЦРЈИПР) учествуваше на меѓународниот настан AGRO EXPO 2026, кој се одржа на 30 и 31 октомври 2026 година во SPACE Park во Скопје, под мотото „Земјоделството на иднината. Денес.“

Настанот претставуваше значајна платформа за поврзување на институциите, земјоделските производители, научноистражувачката заедница, компаниите и организациите кои работат на унапредување на земјоделството, воведување современи технологии и поттикнување на одржливиот регионален развој.

Центарот за развој на Југоисточниот плански регион активно се вклучи во изложбениот дел на настанот со сопствен промотивен штанд, на кој беа претставени проекти, иницијативи и активности насочени кон развој на земјоделството, поддршка на руралните средини, одржливо управување со природните ресурси и унапредување на регионалната соработка.

Преку промотивните материјали и непосредната комуникација со посетителите, претставниците на Центарот ги презентираа проектните активности и резултатите од досегашната работа, со посебен акцент на можностите за примена на иновативни решенија, подобрување на условите за земјоделско производство и создавање нови партнерства во интерес на развојот на Југоисточниот плански регион.

Во рамки на официјалната програма, Тања Митев, претставник на Центарот за развој на Југоисточниот плански регион, учествуваше во делот посветен на регионалната соработка и потребите во земјоделството од аспект на јавниот сектор.

Програмата на AGRO EXPO 2026 опфати презентации на европски проекти, современа земјоделска механизација, дигитални технологии, паметни системи за наводнување, дронови, сензори и решенија базирани на вештачка интелигенција, како и дискусии за можностите за модернизација на земјоделското производство.

Настанот беше организиран во контекст на европскиот проект CAAIVE, кофинансиран од Европската Унија преку програмата Еразмус+, со фокус на развој на стручни знаења, дигитални вештини и примена на вештачката интелигенција во земјоделството. Центарот за развој на Југоисточниот плански регион беше вклучен и во организациските активности на настанот, заедно со останатите партнери како партнер во проектот.

Учеството на AGRO EXPO 2026 овозможи размена на искуства, воспоставување контакти со потенцијални партнери и промоција на развојните потенцијали на Југоисточниот плански регион, особено во областа на земјоделството и руралниот развој.

Центарот за развој на Југоисточниот плански регион продолжува посветено да работи на промоција и реализација на проекти кои придонесуваат кон модернизација на земјоделството, зајакнување на локалната економија, одржливо искористување на регионалните ресурси и подобрување на квалитетот на животот на населението во регионот.

Одржана првата регионална работилница за изработка на Програмата за развој на Југоисточниот плански регион за 2027–2031 година

На 30 октомври 2026 година, во Домот на АРМ во Струмица, се одржа првата регионална работилница посветена на подготовката на новата Програма за развој на Југоисточниот плански регион за периодот 2027–2031 година.

Работилницата беше организирана во рамки на процесот на стратешко планирање на регионалниот развој, со цел да се согледаат актуелните состојби, развојните предизвици и потенцијалите на Југоисточниот плански регион, како и да се постават основите за дефинирање на идните стратешки приоритети и развојната визија за регионот.

На работилницата учествуваа претставници на општините од Југоисточниот плански регион, јавните институции, приватниот сектор, граѓанските организации и други релевантни чинители, кои преку заедничка дискусија и активно учество придонесоа кон процесот на креирање на новиот стратешки документ.

Во првиот дел од работилницата беа презентирани прелиминарните резултати од завршната евалуација на Програмата за развој на Југоисточниот плански регион за периодот 2021–2026 година. Преку презентација и пленарна дискусија, учесниците имаа можност да ги разгледаат клучните наоди, да дадат свои согледувања и да придонесат кон нивното валидирање.

Посебно внимание беше посветено на анализата на моменталната состојба во регионот, преку разгледување на клучните наоди од нацрт-секторските анализи во различни тематски области. Дискусијата беше насочена кон идентификување на главните развојни предизвици, постојните ресурси и можностите за понатамошен економски, социјален и одржлив развој на регионот.

Во продолжение, учесниците работеа во тематски групи на подготовка на SWOT анализи, преку идентификување на силните и слабите страни, можностите и заканите во рамки на приоритетните стратешки области. Овој партиципативен пристап овозможи размена на искуства, мислења и предлози од различни засегнати страни, со цел идните развојни приоритети да ги одразуваат реалните потреби на регионот.

Значаен дел од работилницата беше посветен и на дискусијата за дефинирање на заедничка развојна визија за Југоисточниот плански регион до 2031 година, како основа за понатамошното формулирање на стратешките цели, мерките и активностите во новата Програма.

Подготовката на Програмата за развој на Југоисточниот плански регион за 2027–2031 година претставува важен процес за воспоставување долгорочна и усогласена развојна рамка, која ќе придонесе за подобрување на квалитетот на живот на граѓаните, зајакнување на регионалната конкурентност, рационално користење на расположливите ресурси и поттикнување рамномерен и одржлив регионален развој.

Процесот продолжува со втората регионална работилница, предвидена за 25 ноември 2026 година, на која ќе продолжат консултациите и заедничката работа со релевантните чинители во насока на понатамошно дефинирање на развојните приоритети.

Центарот за развој на Југоисточниот плански регион останува посветен на обезбедување транспарентен, инклузивен и партиципативен процес на стратешко планирање, во кој активно ќе бидат вклучени сите релевантни чинители од регионот, со заедничка цел – создавање подобри услови за одржлив развој и просперитет на Југоисточниот плански регион.

Активноста се реализира во рамки на процесот на подготовка на Програмата за развој на Југоисточниот плански регион за 2027–2031 година, со поддршка на Министерството за локална самоуправа на Република Северна Македонија и Швајцарската агенција за развој и соработка (SDC).

Ново специјализирано комунално возило за унапредување на комуналните услуги во Општина Струмица

Центарот за развој на Југоисточниот плански регион на 29 октомври 2026 година изврши примопредавање на ново специјализирано комунално возило од марката Ford Trucks 1833DC, наменето за подобрување на комуналните услуги и унапредување на системот за управување со отпад на територијата на Општина Струмица.

Набавката на возилото е реализирана во рамки на проектот „Модернизација на регионот – набавка на специјализирани возила“, кој се спроведува од страна на Центарот за развој на Југоисточниот плански регион, со финансиска поддршка од Министерството за локална самоуправа – Бирото за регионален развој, преку Програмата за рамномерен регионален развој за 2026 година, со кофинансирање од Општина Струмица.

Примопредавањето се реализираше во просториите на јавното комунално претпријатие во Струмица, со што се создаваат услови за понатамошно зајакнување на техничките и оперативните капацитети за обезбедување поквалитетни и поефикасни комунални услуги.

Новото специјализирано возило е наменето за собирање и транспорт на комунален отпад и ќе придонесе за подобрување на организацијата и ефикасноста на комуналните служби, како и за поефективно одржување на јавната хигиена во урбаните и руралните населени места на територијата на Општина Струмица.

Со реализацијата на оваа инвестиција се очекува постигнување на повеќе значајни придобивки, меѓу кои зголемување на ефикасноста при собирањето и транспортот на комуналниот отпад, подобрување на јавната чистота, намалување на ризикот од создавање диви депонии и унапредување на заштитата на животната средина.

Дополнително, модернизацијата на комуналната инфраструктура ќе овозможи подобро искористување на расположливите ресурси, унапредување на квалитетот на услугите што им се обезбедуваат на граѓаните и создавање поздрава и почиста животна средина.

Оваа инвестиција претставува уште еден конкретен чекор кон остварување на целите за рамномерен регионален развој, преку поддршка на општините во подобрувањето на локалната инфраструктура, јакнењето на јавните услуги и воспоставувањето поодржливи практики во управувањето со комуналниот отпад.

Центарот за развој на Југоисточниот плански регион и во наредниот период ќе продолжи со реализација на проекти и инвестиции насочени кон модернизација на регионалната и локалната инфраструктура, подобрување на квалитетот на живот на граѓаните и поттикнување на одржливиот развој на Југоисточниот плански регион.

Преку проектот „Heart Safe CBA“ до посилни здравствени капацитети и побезбедна прекугранична заедница

На 29.10.2026 година во Струмица се одржа прес-конференција на која беше претставен проектот „Heart Safe CBA – Towards a Cross-Border Area Safe for the Heart“ на која беа присутни претставници на медиумите, Здравствените домови од Југоисточниот регион, Црвен крст и општините.
На настанот беа презентирани целите, партнерството, планираните активности и очекуваните резултати од проектот, кој се реализира во рамките на програмата Interreg VI-A IPA Грција – Северна Македонија 2021–2027, со финансиска поддршка од Европската Унија и националните фондови.
Проектот е насочен кон подобрување на подготвеноста за навремена и ефикасна реакција при срцев застој и други животозагрозувачки состојби, преку едукација, современа медицинска опрема и унапредување на практичните капацитети на здравствените служби.
Една од најзначајните компоненти предвидува обука на повеќе од 1.200 здравствени работници, граѓани и волонтери за примена на техники за спасување животи, основно и напредно одржување во живот и соодветно постапување во итни медицински ситуации.
Покрај едукативните активности, проектот опфаќа и набавка на современа медицинска опрема, вклучително и амбулантни возила, дефибрилатори и електрокардиографи, како и воспоставување капацитети за медицинска симулација и практична обука.
Проектот се реализира преку партнерство на Центарот за развој на Југоисточниот плански регион, Универзитетската болница АХЕПА од Солун и Хеленското здружение за итна претхоспитална медицинска грижа (HSEPC). Преку здружување на институционалното и медицинското искуство од двете земји, партнерите работат на создавање подобро подготвен и поотпорен прекуграничен регион.
„Знаењето спасува животи. Секоја секунда е важна.“ е пораката што ја отсликува суштината на проектот и неговата определба – навремената реакција, обучените луѓе и соодветната медицинска опрема да станат достапни и ефикасни ресурси во заштитата на човечкиот живот.

Претставници од Југоисточниот плански регион учествуваа на меѓурегионална средба во Кожани, Грција

На 20 и 21 октомври 2026 година, претставници од Центарот за развој на Југоисточниот плански регион учествуваа на третата меѓурегионална средба во Кожани, Грција, организирана во рамките на проектот СИЈМА – „Социјални иновации за можности за работа и развој во рударските области во транзиција низ Европа“. Средбата беше посветена на социјалните иновации, претприемништвото и создавањето можности за вработување во рударските региони кои се наоѓаат во процес на економска и општествена транзиција.

Во текот на дводневната програма, партнерите од Македонија, Грција, Германија, Шпанија и Унгарија разменија искуства, добри практики и идеи за справување со предизвиците поврзани со губењето работни места, одливот на кадри и иселувањето на младите од регионите погодени од транзициските процеси.

Учесниците реализираа студиски посети на Центарот за развој на вештини и вработување во Кожани, Социјалниот Хаб (Insocial Hub), Регионалниот фонд за развој и Универзитетот на Западна Македонија. Преку презентации и директни средби со претставници на овие институции, учесниците имаа можност да се запознаат со успешни модели за поддршка на социјалната економија, развој на вештини, социјално претприемништво и локални иновациски иницијативи.

Посебно внимание беше посветено на улогата на партнерствата помеѓу институциите, образовниот сектор, граѓанските организации и бизнис заедницата во создавањето одржливи можности за локален развој и вработување. Во рамките на тематските работилници се дискутираше и за начините на кои социјалните иновации можат да придонесат кон создавање нови работни места и подобрување на квалитетот на живот во заедниците што се соочуваат со транзициски предизвици.

Стекнатите знаења и искуства ќе придонесат кон унапредување на регионалните политики и иницијативи во Југоисточниот плански регион, со фокус на поддршка на претприемништвото, развојот на вештини, социјалните иновации и создавањето подобри можности за младите луѓе.

Проектот СИЈМА е кофинансиран од програмата Интеррег Европа и има за цел да ја поттикне меѓурегионалната соработка и размената на искуства за подобрување на политиките за развој во регионите во транзиција низ Европа.

Искуствата од Лајпциг и Борна во фокусот на вториот состанок на Регионалната група на засегнати страни во рамките на проектот СИЈМА

На 6 октомври 2026 година, во просториите на Центарот за развој на Југоисточниот плански регион во Струмица, се одржа вториот состанок на Регионалната група на засегнати страни во рамките на проектот СИЈМА – Социјални иновации за можности за работа и развој во рударските области во транзиција низ Европа, кој се спроведува во рамките на програмата Интеррег Европа.

На состанокот учествуваа претставници од општините од Југоисточниот плански регион и претставници од невладиниот сектор, а во фокусот на состанокот беа искуствата, сознанијата и добрите практики од меѓурегионалната студиска посета и тематските активности во Лајпциг и Борна, Германија, со посебен осврт на начинот на кој поранешните рударски подрачја се справуваат со структурните промени и создаваат нови развојни можности.

Германските искуства беа разгледани и во контекст на Југоисточниот плански регион, со посебен фокус на рударските подрачја во Радовиш и Конче. Во рамките на стручната презентација „Техничка стратегија за трансформација по рударството – Примена на германските иновации по рударството (Борна/Лајпциг) во рударските зони на Радовиш и Конче“, беа презентирани можности за поврзување на искуствата од Германија со регионалните предизвици и потенцијали.

Посебно внимание беше посветено на поранешниот рудник Дамјан, заштитата и управувањето со водните ресурси, рекултивацијата на рударските подрачја, како и на потенцијалите на езерото Мантово во однос на земјоделството, водоснабдувањето, рекреацијата и туризмот. По презентацијата следеше отворена дискусија, во која учесниците разменија мислења за можностите за примена и прилагодување на дел од презентираните пристапи кон условите и потребите на Југоисточниот плански регион.

Преку ваквите средби, проектот СИЈМА овозможува учење од европските искуства и нивно поврзување со локалниот контекст, истовремено поттикнувајќи соработка меѓу локалните власти, граѓанскиот сектор и другите релевантни чинители.

Искуствата и заклучоците од меѓурегионалната размена помеѓу партнерските региони од Северна Македонија, Шпанија, Германија, Грција и Унгарија ќе претставуваат основа за понатамошната работа во рамките на проектот и за идентификување на можни пристапи и мерки за одржлив економски и социјален развој на подрачјата кои се соочуваат со структурни промени поврзани со рударството.

     

50 здравствени работници обучени за навремена реакција во животозагрозувачки ситуации

Знаењето и брзата реакција можат да бидат пресудни кога секоја секунда е важна. Токму на навременото препознавање и соодветното постапување во животозагрозувачки ситуации беше посветена дводневната Intermediate Life Support (ILS) обука, која успешно заврши во Струмица со учество на 50 здравствени работници од Југоисточниот регион.

Обуката се одржа на 30 септември и 1 октомври во хотел „Сириус“, во организација на Центарот за развој на Југоисточниот плански регион (ЦРЈИПР), во рамки на проектот „Heart Safe CBA – Towards a Cross-Border Area Safe for the Heart“, кофинансиран од Interreg VI-A IPA CBC Greece – North Macedonia 2021–2027 Programme.

Лекари, медицински сестри и други здравствени работници во текот на двата дена работеа со четворица обучувачи од грчките проектни партнери, комбинирајќи теоретска настава со практични вежби и симулации на итни медицински состојби. Фокусот беше ставен на развивање на практични вештини за рано препознавање на состојбата на пациентот, навремено започнување на соодветна интервенција и ефикасно постапување во ситуации во кои брзината и координацијата се од особено значење.

Работата во мали групи им овозможи на учесниците стекнатото теоретско знаење да го применат во симулирани сценарија, со што обуката беше насочена не само кон стекнување знаење, туку и кон неговата практична примена во реални услови.

„Heart Safe CBA“ преку ваквите активности придонесува кон унапредување на капацитетите на здравствените работници и подобрување на подготвеноста за итни медицински ситуации во прекуграничниот регион.

ILS обуката е дел од пошироката серија активности на проектот, преку кои партнерите од Северна Македонија и Грција работат на јакнење на здравствените капацитети и развивање на побезбедна прекугранична област.

Heart Safe CBA – Towards a Cross-Border Area Safe for the Heart.

FIREDEFEND | Посета на Пилот локација во Општина Босилово

Во рамки на проектот FIREDEFEND – „Fire Detection and Enhanced Fire Emergency Network for Waste Disposal“, проектните партнери реализираа техничка теренска посета на предложената пилот локација во Општина Босилово, каде е предвидено поставување на современ систем за рана детекција и мониторинг на пожари.

Во рамки на посетата, партнерите беа пречекани од градоначалникот на Општина Босилово, г. Ристо Манчев, кој ја истакна важноста на проектот за унапредување на превенцијата и навременото справување со ризиците од пожари на локално ниво, како и значењето на соработката меѓу локалните институции и проектните партнери.

Теренската посета овозможи непосреден увид во потенцијалната локација за поставување на системот, разгледување на техничките и теренските услови и заедничка дискусија за следните чекори во реализацијата на пилот активноста.

На посетата учествуваа претставници од Регионалната асоцијација на агенции за управување со цврст отпад на Централна Македонија (FODSA), Грција, Центарот за развој на Југоисточниот плански регион, претставници од Општина Босилово, како и технички експерти.

Преку заедничка теренска проценка, размена на искуства и прекугранична соработка, FIREDEFEND продолжува кон воспоставување поефикасни механизми за рана детекција, превенција и навремена реакција при пожари во прекуграничниот регион. 🇪🇺🇬🇷🇲🇰

Проектот FIREDEFEND е кофинансиран од Европската Унија преку Програмата Interreg VI-A IPA Грција – Северна Македонија 2021–2027.

FIREDEFEND | Заеднички чекори за успешна реализација

На 22 септември 2026 година продолжија активностите во рамки на проектот FIREDEFEND – „Fire Detection and Enhanced Fire Emergency Network for Waste Disposal“, со одржување на вториот работен состанок на проектните партнери, во организација на Центарот за развој на Југоисточниот плански регион (ЦРЈИПР) посветен на размена на знаења, искуства и добри практики, вториот ден беше насочен кон конкретната имплементација на проектот, координацијата меѓу партнерите и дефинирањето на следните заеднички чекори.

Посебен акцент беше ставен на пилот активностите и воспоставувањето современ систем со термални камери за рана детекција и мониторинг на пожари. Во рамки на прекуграничниот систем, од грчка страна е предвидено поставување на термални камери на локации во Јаница, Килкис и Едеса, додека во Југоисточниот плански регион системот ќе биде воспоставен на територијата на Општина Босилово. На овој начин, FIREDEFEND ќе придонесе кон подобро следење на ризичните подрачја, навремено откривање на потенцијални пожари и побрза реакција на надлежните служби од двете страни на границата.

Од планирање и размена на знаење – кон конкретни активности и решенија на терен. Токму преку заедничката работа на партнерите од Македонија и Грција, FIREDEFEND го претвора прекуграничното партнерство во практични активности за подобра превенција од пожари, управување со ризиците и заштита на животната средина. 🔥🌿🇬🇷🇲🇰

🇪🇺 Проектот FIREDEFEND е кофинансиран од Европската Унија преку Interreg VI-A IPA Програмата за прекугранична соработка Грција – Северна Македонија 2021–2027.