HEART SAFE CBA – посилни здравствени капацитети, навремена медицинска помош и прекуграничен регион побезбеден за срцето

Изминатата недела преку проектот „HEART SAFE CBA – Towards a Cross-Border Area Safe for the Heart“, во рамките на Програмата за прекугранична соработка Interreg VI-A IPA Македонија – Грција 2021–2027 четирите здравствени домови во Југоистокот- Струмица, Радовиш, Гевгелија и Валандово добија нови, современи и целосно опремени амбулантни возила, наменети за унапредување на итната медицинска помош и обезбедување побрза, поефикасна и поквалитетна здравствена услуга за граѓаните.

Секое возило располага со современа медицинска опрема од најнова технологија, а вредноста на поединечното возило со вклучената опрема изнесува приближно 100.000 евра. Опремата овозможува соодветно згрижување, следење на здравствената состојба и навремена реакција при итни медицински состојби, кога секоја минута е од особено значење.

Реализацијата на оваа инвестиција претставува конкретен придонес кон јакнењето на здравствената инфраструктура во Југоисточниот плански регион, подобрувањето на условите за работа на медицинските тимови и зголемувањето на подготвеноста на здравствените установи за навремено и ефикасно справување со итни медицински состојби.

 

 

 

Проектот се реализира со финансиска поддршка од Европската Унија и националните фондови, а партнери се Центарот за развој на Југоисточниот плански регион, Универзитетската болница АХЕПА од Солун и Здружение за итна предболничка нега на Грција.

Преку прекуграничната соработка и заедничкото вложување во современа медицинска опрема, знаење и човечки капацитети, се создаваат подобри услови за здравствена заштита и побезбедна иднина за граѓаните од двете страни на границата.

Од климатски предизвици до локални решенија – Одржана третата G4G работилница во Гевгелија

На 12 ноември 2026 година, во G4G центарот во Гевгелија, се одржа третата работилница во рамки на проектот „Зелено за добро“ (G4G), на тема „Локален развој отпорен на климатски промени“. Работилницата беше организирана од проектниот партнер CISS, со учество на претставници од локалните институции, проектните партнери и други засегнати страни.

Како климатските предизвици да се претворат во можности за одржлив локален развој? Ова беше главното прашање на работилницата, која ги поврза европските климатски политики со конкретни решенија применливи на локално ниво во прекуграничниот регион.

Проф. д-р Страхиња Трпевски ги претстави европските стратегии и цели до 2030 година, со посебен осврт на пет меѓусебно поврзани области: обновлива енергија, управување со води, шумарство, земјоделство и туризам.

Преку практични примери беа разгледани можностите за подобрување на енергетската ефикасност на јавните објекти, користење соларна енергија и дигитални алатки за енергетско планирање. Посебно внимание беше посветено и на одржливото управување со водните ресурси, заштитата на шумите од пожари, климатски отпорното земјоделство и приспособувањето на туристичките дестинации кон климатските промени.

Од идеи до конкретни предлози

Интерактивниот дел им овозможи на учесниците заеднички да идентификуваат приоритети и да предложат можни решенија за локалните климатски предизвици. Меѓу разгледаните идеи беа подобар мониторинг на водите, превенција од шумски пожари, поефикасно користење на ресурсите во земјоделството, циркуларна економија и одржлив и пристапен туризам.

Дискусијата ги опфати и главните пречки за реализација – финансиски средства, застарена инфраструктура, административни процедури и потреба од подобра координација меѓу институциите.

Практичниот дел беше дополнет со две теренски посети, каде што учесниците имаа можност да се запознаат со конкретни примери од областа на управувањето со води и обновливата енергија.

Работилницата уште еднаш ја потврди важноста на соработката меѓу општините, јавните институции и другите локални чинители за развој на практични, одржливи и климатски отпорни решенија.

Проектот „Зелено за добро“ (G4G) се имплементира во рамки на Интеррег VI-A ИПА Програмата Грција – Северна Македонија 2021–2027 и е кофинансиран од Европската Унија и националните фондови на земјите учеснички.

 

ОДРЖАНА СЕДМАТА СЕДНИЦА НА СОВЕТОТ ЗА РАЗВОЈ НА ЈУГОИСТОЧНИОТ ПЛАНСКИ РЕГИОН

На 03.11.2026 год. се одржа седмата седница на Советот за развој на Југоисточниот плански регион, на која беа разгледани прашања поврзани со работата на Центарот, управувањето со проектната опрема и идните развојни иницијативи во регионот.

На седницата беше усвоен записникот од претходната седница, а за вршител на должноста директор на Центарот за развој на Југоисточниот плански регион повторно беше избран Јован Коцев.

Исто така, беа донесени одлуки за преотстапување на опрема и софтвер на Центарот за управување со кризи – Скопје, набавени преку проектот „Интегриран оперативен центар за хуманитарна помош – HELP“, како и за преотстапување на комунално возило на Општина Струмица, набавено во рамките на проектот „Модернизација на регионот – набавка на специјализирани возила“.

Во продолжение, компанијата Тримакс – Скопје презентираше предлог-проекти за општините од областа на спортот, образованието, технологијата и туризмот, како и интерактивна дигитална платформа за културно и туристичко информирање.

На седницата беше презентиран и Патоказот за Зелената агенда за Југоисточниот плански регион од страна на Центарот за климатски промени – Гевгелија, како насока за идните активности во областа на одржливиот регионален развој и заштитата на животната средина.

Центарот за развој на Југоисточниот плански регион со промотивен штанд на AGRO EXPO 2026 во Скопје

Центарот за развој на Југоисточниот плански регион (ЦРЈИПР) учествуваше на меѓународниот настан AGRO EXPO 2026, кој се одржа на 30 и 31 октомври 2026 година во SPACE Park во Скопје, под мотото „Земјоделството на иднината. Денес.“

Настанот претставуваше значајна платформа за поврзување на институциите, земјоделските производители, научноистражувачката заедница, компаниите и организациите кои работат на унапредување на земјоделството, воведување современи технологии и поттикнување на одржливиот регионален развој.

Центарот за развој на Југоисточниот плански регион активно се вклучи во изложбениот дел на настанот со сопствен промотивен штанд, на кој беа претставени проекти, иницијативи и активности насочени кон развој на земјоделството, поддршка на руралните средини, одржливо управување со природните ресурси и унапредување на регионалната соработка.

Преку промотивните материјали и непосредната комуникација со посетителите, претставниците на Центарот ги презентираа проектните активности и резултатите од досегашната работа, со посебен акцент на можностите за примена на иновативни решенија, подобрување на условите за земјоделско производство и создавање нови партнерства во интерес на развојот на Југоисточниот плански регион.

Во рамки на официјалната програма, Тања Митев, претставник на Центарот за развој на Југоисточниот плански регион, учествуваше во делот посветен на регионалната соработка и потребите во земјоделството од аспект на јавниот сектор.

Програмата на AGRO EXPO 2026 опфати презентации на европски проекти, современа земјоделска механизација, дигитални технологии, паметни системи за наводнување, дронови, сензори и решенија базирани на вештачка интелигенција, како и дискусии за можностите за модернизација на земјоделското производство.

Настанот беше организиран во контекст на европскиот проект CAAIVE, кофинансиран од Европската Унија преку програмата Еразмус+, со фокус на развој на стручни знаења, дигитални вештини и примена на вештачката интелигенција во земјоделството. Центарот за развој на Југоисточниот плански регион беше вклучен и во организациските активности на настанот, заедно со останатите партнери како партнер во проектот.

Учеството на AGRO EXPO 2026 овозможи размена на искуства, воспоставување контакти со потенцијални партнери и промоција на развојните потенцијали на Југоисточниот плански регион, особено во областа на земјоделството и руралниот развој.

Центарот за развој на Југоисточниот плански регион продолжува посветено да работи на промоција и реализација на проекти кои придонесуваат кон модернизација на земјоделството, зајакнување на локалната економија, одржливо искористување на регионалните ресурси и подобрување на квалитетот на животот на населението во регионот.

Одржана првата регионална работилница за изработка на Програмата за развој на Југоисточниот плански регион за 2027–2031 година

На 30 октомври 2026 година, во Домот на АРМ во Струмица, се одржа првата регионална работилница посветена на подготовката на новата Програма за развој на Југоисточниот плански регион за периодот 2027–2031 година.

Работилницата беше организирана во рамки на процесот на стратешко планирање на регионалниот развој, со цел да се согледаат актуелните состојби, развојните предизвици и потенцијалите на Југоисточниот плански регион, како и да се постават основите за дефинирање на идните стратешки приоритети и развојната визија за регионот.

На работилницата учествуваа претставници на општините од Југоисточниот плански регион, јавните институции, приватниот сектор, граѓанските организации и други релевантни чинители, кои преку заедничка дискусија и активно учество придонесоа кон процесот на креирање на новиот стратешки документ.

Во првиот дел од работилницата беа презентирани прелиминарните резултати од завршната евалуација на Програмата за развој на Југоисточниот плански регион за периодот 2021–2026 година. Преку презентација и пленарна дискусија, учесниците имаа можност да ги разгледаат клучните наоди, да дадат свои согледувања и да придонесат кон нивното валидирање.

Посебно внимание беше посветено на анализата на моменталната состојба во регионот, преку разгледување на клучните наоди од нацрт-секторските анализи во различни тематски области. Дискусијата беше насочена кон идентификување на главните развојни предизвици, постојните ресурси и можностите за понатамошен економски, социјален и одржлив развој на регионот.

Во продолжение, учесниците работеа во тематски групи на подготовка на SWOT анализи, преку идентификување на силните и слабите страни, можностите и заканите во рамки на приоритетните стратешки области. Овој партиципативен пристап овозможи размена на искуства, мислења и предлози од различни засегнати страни, со цел идните развојни приоритети да ги одразуваат реалните потреби на регионот.

Значаен дел од работилницата беше посветен и на дискусијата за дефинирање на заедничка развојна визија за Југоисточниот плански регион до 2031 година, како основа за понатамошното формулирање на стратешките цели, мерките и активностите во новата Програма.

Подготовката на Програмата за развој на Југоисточниот плански регион за 2027–2031 година претставува важен процес за воспоставување долгорочна и усогласена развојна рамка, која ќе придонесе за подобрување на квалитетот на живот на граѓаните, зајакнување на регионалната конкурентност, рационално користење на расположливите ресурси и поттикнување рамномерен и одржлив регионален развој.

Процесот продолжува со втората регионална работилница, предвидена за 25 ноември 2026 година, на која ќе продолжат консултациите и заедничката работа со релевантните чинители во насока на понатамошно дефинирање на развојните приоритети.

Центарот за развој на Југоисточниот плански регион останува посветен на обезбедување транспарентен, инклузивен и партиципативен процес на стратешко планирање, во кој активно ќе бидат вклучени сите релевантни чинители од регионот, со заедничка цел – создавање подобри услови за одржлив развој и просперитет на Југоисточниот плански регион.

Активноста се реализира во рамки на процесот на подготовка на Програмата за развој на Југоисточниот плански регион за 2027–2031 година, со поддршка на Министерството за локална самоуправа на Република Северна Македонија и Швајцарската агенција за развој и соработка (SDC).