Одржана дваесет и шестата (XXVI) седница на Советот за развој на Југоисточниот плански регион

На 02.02.2021 година се одржа дваесет и петтата (XXV) седница на Советот за развој на Југоисточниот плански регион, која поради пандемијата Ковид-19, беше одржана онлајн, преку ZOOM платформата. На седницата беа вклучени градоначалниците на општините од регионот и Директорката на Центарот за развој на Југоисточниот плански регион.

На седницата главно се разговараше за начинот на третирање на комарци на териториите на општините во Југоисточниот плански регион за 2021 година. Беше донесена Одлука за взаемна активност на општините за третирање на комарци во 2021 година по земјен пат, врз основа на која ќе се извршат две ларвицидни и три адлутни третирања против комарци, односно три теристички аеросолни дезинсекциии против возрасни комарци со УЛВ метода и две ларвицидни дезинсекции на териториите на десетте општини од регионот.
Оваа Одлука се донесе порано со цел да се запазат роковите и препораките од Центрите за јавно здравје за навремено прскање против комарци и да се следат препорачаните интервали на прскање и третирање за да се зголеми ефикасноста, да се добие најдобар резултат од овој процес и да се заштити здравјето на граѓаните од нашиот регион.

Во исто време се донесе заклучок да се бара од Министерството за транспорт и врски да ја вклучи површината на Моноспитовско блато во локациите кои се приоритетни за прскање против комарци од страна на Министерството како примерот за Дојранското Езеро од нашиот регион. Имено поради недостапноста на теренот нема можност да се изведе теристичка (од земја) аеросолна дезинсекција, а од друга страна оваа блато претставува најголем извор на комарци во овој регион.

На дваесет и петтата седница на Совет на ЈИПР беа донесени и едногласно усвоени и Одлуките за продажба на старото службено моторно возило и за купување на ново службено моторно возило за потребите на Центарот за развој на Југоисточнот плански регион.

На оваа седница беше утврдена и висината на средствата кои секоја од општините од регионот ќе ги одделува на годишно ниво за финансирање и непречено работење на Јавното претпријатие за заловување на бездомни кучиња „Астра – Луна“ – Струмица, за што беше донесена Одлука од страна на Советот.

На 30.12.2020 година поради пандемијата Ковид-19, преку ЗООМ платформата, онлајн се одржа XXIV (дваесет и четвртата) и последна Седница на Советот за развој на Југоисточниот плански регион за 2020 година, на која присуствуваа градоначалниците на општините од регионот и Раководителот на Центарот за развој на Југоисточниот плански регион.

Пред присутните градоначалници, Раководителот на Центарот Г-а Жулиета Ѓуркова ги презентираше Предлог Финансискиот план за работа на Центарот за развој на Југоисточниот плански регион за 2021 година, како и Предлог Акциониот план за 2021 година за спроведување на Програмата за рамномерен регионален развој на Југоисточниот плански регион кои на седницата едногласно беа усвоени.

На оваа Седница исто така беа донесени и едногласно усвоени и одлуките за примопредавање и преотстапување на користење и одржување на локален пат с.Бориево – с.Колешино на општина Босилово и општина Ново Село; Одлуката за примопредавање и преотстапување на користење и одржување на локален патен правец од Клучка со Р 604 пат Струмица – Дојран со клучка П-611 пат Валандово – Гевгелија на општина Дојран и Одлуките за примопредавање и преотстапување на користење и одржување на пат Богородица – Стојаково, крстосница со регионален пат Гевгелија – Богородица прва фаза на општина Богданци и втора фаза на општина Гевгелија.

На 07.12.2020 година, се одржа дваесет и втората (XXII) Седница на Советот за развој на Југоисточниот плански регион, он-лајн преку виртуелната платформа Zoom, поради настанатата вонредна состојба на светско ниво COVID 19.

На Седницата присуствуваа Градоначалниците од општините во состав на Југоисточниот плански регион, како и експертот Г-н Тихомир Петрески задолжен за изработка на студија на исплатливост за секој од избраните концепт решенија.

Клучна точка на оваа Седница на Советот за развој на Југоисточниот плански регион беше презентација на предложените концепт решенија, четврти чекор од концептот за регионални форуми на заедницата, алатка за идентификација, приоретизирање и подготовка на проекти за финансирање од Програмата за рамномерен регионален развој за 2021 година, преку Министерство за локална самоуправа и Бирото за регионален развој.

Предложените концепт решенија беа претходно идентификувани, врз основа на избраните приоритетни области и подобласти од спроведената прва форумска сесија, што беше спроведена преку он-лајн прашалник. Понатаму со ангажираниот надворешен експерт, Тихомир Петрески, беа спроведени неколку состаноци со градоначалниците и претставници од општините од Југоисточниот регион врз основа на кои беа идентификувани пет концепт решенија како одговор на идентификуваните проблеми и тоа:

Концепт 1 – Збогатување на туристичката понуда во Југоисточниот плански регион.
Концепт 2 – Изградба на Локален пат на релација Колешино – Бориево (трета фаза).
Концепт 3 – Изградба на Локален пат на релација с.Погулево – с.Дамјан.
Концепт 4 – Изградба на пристапен пат до регионалниот стационар за бездомни кучиња.
Концепт 5 – Изградба на Локален патен правец Л603 за поврзување на патниот правец – Стојаково – Ѓавато со крстосницата со регионалниот пат Р1109.

Советот за развој на Југоисточниот плански регион одлучи сите пет да преминат во следната фаза т.е во фазата на приоритизација која ќе се спроведе по пат на електронски прашалник, како втора форумска сесија преку која населението од регионот ќе има можност да дава забелешки и препораки за нивно подобрување, за на крај Советот за развој на Југоисточниот плански регион ја утврди годишната приоритетна листа на предлог-проекти за финансирање од Програмата за рамномерен регионален развој за 2021 година.

Целиот процес на идентификација на предлог-проектите за финансирање преку Програмата за рамномерен регионален развој за 2021 година се спроведува во рамки на проектот „Одржлив и инклузивен рамномерен регионален развој“, проект на Швајцарската агенција за развој и Министерството за локална самоуправа.

На 11.03.2020 година во просториите на ЦРЈИПР се одржа Шеснаесеттата Седница на Советот за развој на Југоисточниот плански регион на која присуствуваа градоначалниците од општините од регионот и Раководителот на Центарот за развој на Југоисточниот плански регион.

Градоначалниците на општините од Југоисточниот плански регион на Седницата донесоа Одлука за формирање на Регионално јавно претпријатие врз база на меѓуопштинска соработка како модел кое ќе управува со прифатилиштата за бездомни животни и ќе врши заловување, транспорт и хумано третирање на бездомните животни од целиот регион за кои веќе се набавени две возила за заловување на бездомните животни од регионот. За почеток ќе функционира само прифатилиштето во Струмица, кое е целосно изградено и опремено за потребите на струмичко-радовишкиот микрорегион, додека пак Прифатилиштето во Валандово е во почетна фаза на изградба и истото ќе биде наменето за потребите на гевгелиско-валандовскиот регион. Со ваквата Одлука Југоисточниот регион е прв регион во државата кој заеднички се обидува да го реши проблемот со бездомните животни.

На Седницата исто така се донесе и едногласна Одлука за прв пат на територија на општините од Југоисточниот регион годинава да се спроведе третирање против ларвицидна и адултна форма на комарци по земјен пат за взаемна заштита на општините од регионот, со цел постигнување на поголем ефект и превенција.

Меѓудругото на Седницата бешe донесена и Одлука за промена на седиштето на Центарот за развој на Југоисточниот плански регион, како и Одлука за предавање и преотстапување на користење и одржување на објект по проект „Туристичка патека од природата до културата на планината Плавуш“ на општина Валандово, а беа усвоени и Завршните сметки за 2019 година на ЦРЈИПР, Годишниот извештај за работата на ЦРЈИПР за 2019 година и Извештајот за попис за 2019 година на ЦРЈИПР.