Приказните од терен и размената на искуства продолжуваат со зголемен интензитет

Дел од доброволните и професионалните пожарникари од југоистокот на Р.С. Македонија и југозападот на Р. Бугарија, на 13 и 14 Октомври, 2022 присуствуваа на втората специјализирана обука во Банско, Република Бугарија, од предвидените шест дводневни специјализирани обуки како дел од активностите на проектот “Прекугранична соработка во справување со шумски пожари”.

Давањето прва помош како еден круцијален момент при несреќи е темата која побуди најголем интерес кај учесниците кои будно и внимателно следеа за да си ги обноват своите знаења, но и да научат мнoгу нови. Обуката беше спроведена од страна на парамедик – болничар г-дин Владимир Филков, член на доброволното противпожарно друштво од Благоевград.

 

Пожарникарите вториот ден го поминаа на терен со практични вежби и примери од втората тематска единица која беше обработена од страна на г-дин Пламен Тодоров, инспектор од Националната Асоцијација на доброволците во Република Бугарија. Пожарникарите и доброволците имаа можност да работат со дел од опремата со која работи и располага територијалната противпожарна единица на Банско. Приказните од терен и размената на искуства продолжуваат и овој пат со зголемен интензитет и интерес од страна на сите учесници во обуката.

 

Обуките се дел од имплементацијата на проектот за “Прекугранична соработка во справување со шумски пожари“ финансиран од Европската Унија преку Интеррег ИПА Програмата за прекугранична соработка помеѓу Р. Бугарија и Р. Северна Македонија 2014-2020, проект кој Центарот за развој на Југоисточниот плански регион го спроведува во партнерство со Асоцијацијата на Југозападни општини, Благовеград, Република Бугарија.

19 млади од регионот се стекнаа со вештини за развој на бизнис планови

Седумдневното дружење во рамките на Кампот за млади иноватори и претприемачи 2022 заврши со презентација на 6 бизнис планови кои беа подготвени од страна на сите учесници под менторство на професори од областа на економијата и бизнисот.

19 млади лица на возраст од 18 до 29 години, преку секојдневни интерактивни предавања од страна на еминентни универзитетски професори, успешни претприемачи и експерти, се стекнаа со нови знаења и вештини во областа на иновациите и претприемништвото. Преку работење во групи и изготвување на бизис планови, се запознаа со основите на претприемништвото, деловната комуникација како круцијален дел во бизнис светот и основањето на сопствени бизниси.

Освен обуките за претприемништво, организирани беа и мотивационо-забавни активности каде младите беа во можност да слушнат успешни животни и бизнис приказни, совети за здрав животен стил со цел да се мотивираат и да работат на бизнис идеи кои беше предвидено учесниците да ги презентираат на завршниот ден од кампот.

Времето поминато во едукација и забава, стекнатите нови знаења и пријатната атмосфера во оваа седумдневно претприемачко патување беа поттик за овие млади да изразат желба и да се стекнат со право за учество во тридневното студиско патување во Грција, кое во наредниот период е предвидено да се одржи во рамките на проектот.

Сите учесници на кампот се стекнаа со сертификати за учество како и со книга насловена како „7 навики на успешните луѓе“ од Стивен Кови кој важи за  најпочитуваниот мотиватор во корпоративниот свет. Учесниците со најдобри бизнис идеи ќе добијат и бесплатно користење на Заедничкиот работен простор кој се наоѓа во просториите на Центарот за развој на Југоисточниот плански регион во Струмица.

Кампот беше организиран со цел да се поттикне претприемачкиот дух на младите во регионот, мотивот за соработка, развој на своите бизнис идеи во бизнис планови, како и активно учество на пазарот на трудот.

 

Голема благодарност до соработниците кои придонесоа Кампот за млади иноватори и претприемачи 2022 година да биде корисен за сите учесници и запаметен како добар пример за учење, дружење и соработка:

Петрески и партнери – за поддршка во целосната организација на Кампот, за споделените реални примери од деловниот свет, интерактивните игри како и секојдневната поддршка на учесниците во разработката на нивните идеи;

Проф. Д-р Еленица Софијанова – за обуките за Деловна комуникација;

Филип Чаловски – за споделените мотивациски совети и кулинарски трикови;

Проф. Д-р Илија Груевски – за обуките за Финанскиски планови;

Ирина Тростјанска – за споделените бизнис совети и фитнес активности;

Ивона Трајановска – за споделените совети за финансирање на стартапи;

Проф. Д-р Влатко Пачешкоски – за обуките за подоготовка на бизнис планови;

Елена Божиновска – за споделеното искуство за развивање на бизнис идеја од областа на социјалното претприемништво;

Филип Петрески – за мотивирање на учесниците да дадат се од себе, секогаш стремејќи се кон својот максимум.

 

Кампот за млади иноватори и претприемачи 2022 беше организиран од страна на Центарот за развој на Југоисточниот плански регион во периодот од 26.09-02.10.2022 година во рамките на проектот „Деловен екосистем како интегриран систем – БИ ИН“ финансиран преку ИНТЕРРЕГ ИПА Програмата за прекугранична соработка помеѓу Грција и Р.С.Македонија.

Со нови искуства и добри практики од терен пожарникарите ја завршија првата специјализирана обука

На 29 и 30 септември, 2022 година во Банско, Бугарија пожарникарите и доброволците ја поминаа првата специјализирана обука како дел од активностите на проектот “Прекугранична соработка во справување со шумски пожари”. Шеесетина учесници од С. Македонија и Буграија беа дел од обуката чија цел беше збогатување и проширување на знаењата во справувањето со шумски пожари.

 

Обуката и практичните вежби ги модерираше и ги спроведе г-а Ралица Тодорова, сертифициран обучувач од Националната Асоцијација на доброволците во Република Бугарија и Главната Дирекција за пожарна безбедност и заштита на населението. Доброволците и професионалците седнаа заедно на маса со цел да споделат стари, но и научат нови знаења и искуства од своите колеги. Со меѓусебна размена на “приказни од терен” и низ теоретски примери и анализи, но и демонстрација на терен во противпожарната станица во Банско, успешно поминаа двата дена од првиот модул кој е само најава и почеток од одржувањето на претстојните специјализирани обуки. Предвидени се вкупно 6 дводневни обуки, од кои 3 ќе се одржат во Република Бугарија и 3 во Република Северна Македонија.

 

Обуките се дел од имплементацијата на проектот за “Прекугранична соработка во справување со шумски пожари“ финансиран од Европската Унија преку Интеррег ИПА Програмата за прекугранична соработка помеѓу Р. Бугарија и Р. Северна Македонија 2014-2020, проект кој Центарот за развој на Југоисточниот плански регион го спроведува во партнерство со Асоцијацијата на Југозападни општини, Благовеград, Република Бугарија.

Јавен повик за учество на Камп за претприемништво и иновации за млади 2022

Имате претприемачки дух и иновативна деловна идеја?

Сакате да ги унапредите вашите претприемачки вештини?

 

Кампот за претприемништво и иновации за млади 2022 отвора

повик за 19 претприемачи кои можат да придонесат за развојот на Југоисточниот регион

 

Камп за претприемништво и иновации за млади 2022

26 септември – 2 октомври 2022, Дојран

 

Центарот за развој на Југоисточниот плански регион заедно со Petreski&Partners организираат Камп за претприемништво и иновации за млади кој ќе се одржи од 26 септември – 2 октомври 2022 во Дојран.

Кампот се организира во рамките на проектот „Деловен екосистем како интегриран систем – Би Ин“ финансиран од Европска Унија и националните фондови на земјите учеснички преку Интеррег ИПА Програмата за прекугранична соработка помеѓу Грција – Р. Северна Македонија.

Главна цел на кампот е да го поттикне претприемачкиот дух и иновативноста кај младите луѓе од Југоисточниот регион и да ги зајакне нивните капацитети неопходни за развивање сопствен бизнис.

 

Што ќе научиш?

Кампот за претприемништво и иновации за млади 2022 овозможува развој на специфични вештини непоходни за основање сопствен бизнис. Учесниците ќе имаат можност да научат повеќе за претприемништвото и иновативните деловни практики, да ги унапредат своите претприемачки вештини и да развијат соодветен деловен план преку практична и интерактивна програма.

Учесниците ќе имаат можност да учат од искусни ментори и успешни претприемачи, да слушнат успешни деловни приказни и да добијат соодветни совети и препораки како да ја развијат својата деловна идеја. Исто така, учесниците ќе научат како да подготват деловен план за својата деловна идеја и како истата да ја претстават.

Покрај ова, Кампот за претприемништво и иновации за млади 2022 овозможува вмрежување на учесниците, запознавање со други талентирани млади луѓе од регионот преку забавни и мотивирачки содржини и активности.

 

Услови за учество

Условите што треба да ги исполнувате доколку сакате да учествувате на кампот се:

1) да сте на возраст помеѓу 18-29 години;

2) да живеете во некоја од десетте општини кои го сочинуваат Југоисточниот плански регион.

Селекцијата на најдобрите 19 кандидати ќе биде според квалитетот и иновативноста на вашите одговори за деловната идеја што ја имате, областа во која сакате да работите или проблемот што сакате да го решите.

По завршувањето на кампот, како поддршка за нивниот понатамошен деловен развој, сите учесници ќе добијат на подарок Книга за претприемништво, а најдобрите од нив ќе имаат можност бесплатно да го користат Заедничкиот работен простор кој се наоѓа во просториите на Центарот за развој на Југоисточниот плански регион во Струмица.

Воедно, сите учесници на кампот ќе имаат можност да бидат дел од тридневното студиско патување во Грција, кое дополнително ќе се организира во рамките на проектот и на кое учесниците ќе имаат можност да посетат бизнис старт-ап центри, бизнис акцелератори и успешни претприемачи од другата страна на границата, со цел понатамошен развој на претприемачките способности.

 

Начин на пријавување

Пополнете го формуларот за пријавување на следниов линк: https://forms.gle/94Vf7ZXis5Bt7GGFA.

Рокот за пријавување е до 20 септември 2022 година.

 

За повеќе информации

Petreski&Partners: тел. за контакт 075/347-712,  е-маил: bootcampei.2022@gmail.com  или

Центар за развој на Југоисточниот плански регион: Марјан Молчанов – проектен асистент, тел. 072/223-628, е-маил: marjan.molchanov@rdc.mk.

Втора ларвицидна дезинсекција против комарци во Југоисточниот регион

Се известуваат граѓаните од општините во Југоисточниот регион, дека на 16 и 17 Август 2022 година, во периодот помеѓу 09 – 16 часот ќе се изврши теристичка (по земја) апликација на средство за уништување на ларви од комарци и тоа со следниот распоред:

  • На 16.08.2022 (Вторник), во општините Валандово, Дојран, Гевгелија, Богданци, Радовиш и Конче;
  • На 17.08.2022 (Среда), во општините Ново Село, Босилово, Василево и Струмица.

Се известуваат сопствениците на пчелни семејства да преземат соодветни мерки за заштита, односно да ги затворат истите во најавениот временски период.

ЦРЈИПР со уште еден нов проект за рано откривање на пожарите и подобрување на капацитетите на противпожарните единиците во Југоистокот

Центарот за развој на Југоисточниот плански регион, во рамките на проектот „Рано откривање на пожарите и нивно движење за превенција и справување со катастрофи – eFIDAR“ на 29ти Јули 2022 година, во Хотел Сириус, Струмица одржа прес конференција на која присуствуваа претставници од противпожарните единици ТТПЕ од Струмица и Гевгелија,  Центарот за управување со кризи, Дирекција за заштита и спасување, Црвен Крст Струмица и медиуми од регионот.

На прес конференцијата беа презентирани активностите и очекуваните резултати со цел подетално запознавање на јавноста со целта на проектот кој го имплементира Центарот за развој на ЈИПР во партнерство со Регионот на Централна Македонија, Грција и Центар за управување со кризи, Република Северна Македонија во рамки на Интеррег ИПА Програмата за прекугранична соработка помеѓу Грција – Р. Северна Македонија.

Проектните активности вклучуваат развој и оперативна евалуација на ИКТ системи за рано откривање пожари, прекугранична мрежа на соработка за ефикасно спречување и управување со природни катастрофи, систем за откривање чад во реално време, кој ќе понуди зголемена точност за локализација на пожарот, минимизирање на лажни аларми и следење на големи површини во 24/ 7 операција на избрани области со висок ризик.

„Во рамки на проектот исто така ќе се набават и две специјализирани возила за територијалните противпожарни единици во Струмица и Гевгелија. Мал камион за спасување за употреба на Територијалната противпожарна единица – Гевгелија кој ќе се користи и за општина Гевгелија, општина Богданци и општина Дојран. Пикап за прв одговор за употреба на Територијалната противпожарна единица Струмица кој ќе се користи и за општина Василево и општина Босилово, општина Ново Село“ – изјави Г-а Жулиета Ѓуркова, Раководител на сектор во Центарот за развој на Југоисточниот плански регион.

„За нас пожарникарите ќе биде од големо значење за гасење на пожари на отворен простор, особено за непристапни места зафатени од шумски пожари.“- истакна Г-н Александар Гудев – Командир на ТППЕ Струмица.

Овој проект е од голема значајност бидејќи ќе биде од корист за потребите на целиот регион секогаш кога има поголем пожар во шумите многупати се зафатени најмалку две општини од регионот и ваквата набавка на специјализирани возила ќе ги олесни интервенциите на терен, а воедно ќе ја зголеми и ефикасноста на сите четири територијални противпожарни единици.

Проектот е финансиран од Европската Унија со вкупна вредност од 1,392,073.50 € од кои буџетот на ЦРЈИПР е 267,939.50 €.

ОДЛОЖЕНО ВТОРОТО ПРСКАЊЕ ПРОТИВ ВОЗРАСНИ КОМАРЦИ ПОРАДИ НЕПОВОЛНИ ВРЕМЕНСКИ УСЛОВИ

Се известуваат граѓаните од општините во Југоисточниот регион, дека СЕ ОДЛОЖУВА второто прскање против возрасни комарци кое беше предвидено да се изврши на  25 и 26 Јули 2022 година.

 

Прскањето се одложува поради неповолни временски услови т.е појава на врнежи во предвидениот период, затоа истото се планира да се спроведе во текот на неделата.

 

За точниот датум за спроведување на планираното прскање против возрасни комарци, граѓаните од Југоисточниот регион ќе бидат дополнително известени.

ПУШТЕН ВО ФУНКЦИЈА ПАТОТ ДО СТАЦИОНАРОТ ВО СТРУМИЦА

Градежните активности по проектот „Изградба на пристапен пат до регионалниот стационар за бездомни кучиња“ се финализираа со што од неодамна патот кој води до прифатилиштето за бездомни животни во општина Струмица е целосно функционален и истиот е пуштен во употреба.

Овој пат е од големо значење за oпштина Струмица, но и за целиот регион. Како Центар особено сме горди на овој проект затоа што и самиот стационар е изграден преку проект кој го имплементираше Центарот за развој на ЈИПР при што се овозможи oпштина Струмица да се здобие со стационар согласно сите стандарди, кој понатаму ќе биде во функција и на останатите општини од регионот. На овој начин прифатилиштето непречено ќе ја извршува работата за која е наменет. Со пуштањето во работа на стационарот бездомните кучиња добиваат можност за хумано и топло згрижување, а во исто време ќе се реши долгогодишниот проблем кој  ги измачува жителите на оваа општина.

Со проектот освен пристапниот пат во должина од 561 метри до прифатилиштето, на влезниот дел од прифатилиштето се уреди паркинг простор, зелената површина, се уреди партерно и хортикултурно, а исто така беа поставени клупи за седење, канти за отпадоци и беа засадени зимзелени дрвја.

Вкупниот буџет на проектот изнесува 4.261.600,00 денари, а е финансиран од Бирото за рамномерен регионален развој и општина Струмица.

ВТОРО ПРСКАЊЕ ПРОТИВ ВОЗРАСНИ КОМАРЦИ НА ТЕРИТОРИЈАТА НА ЈУГОИСТОЧНИОТ РЕГИОН

 

Се известуваат граѓаните од општините во Југоисточниот регион, дека на 25 и 26 Јули 2022 година, во раните утрински часови ќе се изврши авионска дезинсекција против возрасни комарци со следниот распоред:

  • На  25.07.2022 (Понеделник), во општините Струмица и Гевгелија;
  • На 26.07.2022 (Вторник), во општините Богданци, Босилово, Василево, Валандово, Дојран, Конче, Ново Село и Радовиш.

Доколку временските услови се неповолни, авионската дезинсекција ќе се изврши првиот нареден ден,  кога временските услови ќе бидат подобри.

Ги известуваме пчеларите навреме да ги преземат потребните мерки за заштита на пчелните семејства во период од 04.30 до 10.00 часот.

Прва ларвицидна дезинсекција против комарци во Југоисточниот регион

Се известуваат граѓаните од општините во Југоисточниот регион, дека на 12 и 13 Јули 2022 година, во периодот помеѓу 09 – 16 часот ќе се изврши теристичка (по земја) апликација на средство за уништување на ларви од комарци и тоа со следниот распоред:

  • На 12.07.2022 (Вторник), во општините Валандово, Дојран, Гевгелија, Богданци, Радовиш и Конче;
  • На 13.07.2022 (Среда), во општините Ново Село, Босилово, Василево и Струмица.

Се известуваат сопствениците на пчелни семејства да преземат соодветни мерки за заштита, односно да ги затворат истите во најавениот временски период.

Ова е прва ларвицидна дезинсекција од предвидените две кои се планираат да се спроведат на подрачјето на Југоисточниот плански регион. Со еден третман ќе биде опфатена површина од 82 хектари.