Колешинските водопади и Мокринските извори збогатени со нови содржини

Колешинскиот водопад сместен во срцето на планината Беласица, во рамки на активности на проектот „Туризмот – иднината на регионот“ кој го имплементира Центарот за развој на Југоисточниот плански регион во партнерство со општина Ново Село, финансиски поддржан од Бирото за регионален развој доби нови содржини. Поплочена е патека за искачување до водопадот, поставена е нова ограда на местата каде немаше досега и поправена е веќе постоечката, порамнет и насипен е теренот за паркирање покрај кој е додадена паркинг конструкција за велосипеди, обновнени се постојните летниковци, изработена е нова дрвена платформа, поставени се нови канти за отпадоци, клупи, маси, дрвени патокази и сообраќајни знаци со што на туристите ќе им се овозможи пријатен престој при посета на овие туристички дестинации.

Мокринските извори се збогатени со нова бетонирана пристапна патека за лицата со посебни потреби, адаптиран е еден летниковец за лесен пристап со инвалидска количка и обележани се паркинг места за истите. Покрај оваа содржина дополнително се изградени нови летниковци и поправени се постојните, целокупно се заменети старите реквизити со нови (поставени нови канти за отпадоци, дрвени патокази и сообраќајни знаци), изработена е традиционална македонска фурна која сите посетители можат да ја користат.

Изведувачот на активностите на овој проект ДГТ „МАЈСТОР КОМПАНИ“ за помалку од 2 месеци ги заврши предвидените дејствија, а вредноста за реализираните активности изнесува 4.609.623,00 денари со вклучен ДДВ.

Заеднички во интерес на младите од Југоистокот

 На 06 април 2023 година, Центарот за развој на Југосточниот плански регион, претставуван од директорот Ѓоко Камчев и Центарот за истражувања и анализи НОВУС, претставуван од претседателот Ѓорги Милушев потпишаа Меморандум за соработка.
Водени од заедничкиот интерес со овој Меморандум, со цел развој и соработка во делот на млади, ЦРЈИПР и НОВУС се обврзуваат дека заеднички ќе делуваат и ќе работат на јакнење и подобрување на социо-економскиот живот на младите од Југоисточниот плански регион.
Соработката меѓу двете страни ќе биде насочена кон реализација на заеднички проекти преку кои може да се вклучат млади од Југоисточниот плански регион, организирање на средби со граѓански, бизнис и јавен сектор; лобирање и успешно застапување на потребите на целните групи; едукативни и друг вид на активности кои ќе бидат од заеднички интерес чија крајна цел е поголема вклученост и информираност на младите.
Отвори фотографија

ПРОМОВИРАН ПРОЕКТОТ „ЕНЕРГЕТСКИ ЕФИКАСЕН РЕГИОН“

На 24.03.2023 година беше промовиран проектот „Енергетски ефикасен регион“, кој го имплементира Центарот за развој на Југоисточниот плански регион, во партнерство со општините Конче, Радовиш и Василево, а со кој е предвидено изградба на систем на фотонапонски централи на покривите на ООУ „Крсте Петков Мисирков“ и Спортската сала „25 Мај“ во Радовиш со капацитет од 430 KW, како и изработка на софтверски дигитален систем.

На настанот свое обраќање имаа Директорот на ЦРЈИПР, Г-н Ѓоко Камчев, Државниот секретар на Министерството за локална самоуправа, Г-н Кирил Парталов, Градоначалникот на општина Радовиш, Г-н Ацо Ристов, Градоначалникот на општина Конче, Г-н Златко Ристов и Градоначалникот на општина Василево, Г-н Славе Андонов.

„Се надевам дека во наредниот период како врвен приоритет во целите на општините и на Центарот ќе биде токму зелената енергија која што значително ќе придонесе во намалувањето на трошоците на општините, а со тоа дополнително ќе им овозможи тие средства кои што досега ги трошеа на енергенси и електрична енергија да ги употребат за реализација на други проекти, кои што ќе бидат од витално значење за граѓаните од општините Василево, Конче и Радовиш“ – истакна директорот на Центарот, Г-нот Камчев.

Од страна на проектниот тим беа презентирани досегашните и идните активности кои ќе се реализираат, очекуваните резултати, како и придобивките по завршувањето на имплементација на проектот.

Вкупниот буџет на проектот изнесува околу 23 милиони денари, средства обезбедени од Министерството за локална самоуправа и Швајцарската агенција за развој и соработка, а свое учество имаат и трите општини партнери во проектот.

Заврши реконструкцијата на патот до црквата во с. Радичево, Василево

Во рамки на проектот „Туризмот – иднината на регионот“ кој го имплементира Центарот за развој на Југоисточниот плански регион, финансиски поддржан од Бирото за регионален развој успешно заврши реконструкцијата на патот до црквата „Св. Илија“ во с.Радичево, Василево во вредност од 2 196 616 денари, со што се реши еден од главните проблеми на жителите во ова населено место.

Станува збор за улица која го поврзува селото со црквата и гробиштата во должина од 327 метри, а широка 3 метри. На истата се поставени околу 1000 метри квадратни асфалт. Одводнувањето беше решено со риголи кои во иднина ќе го штитат асфалтот како и околните површини од неконтролираното излевање на водата во случај на обилни врнежи.

Со асфалтирањето на оваа улица се реши  проблемот  на граѓаните од Радичево кои долги години наназад се соочуваа  со лош пристап до црквата и гробиштата.

Изведувач на работите беше градежната фирмата „Бони Интерградба“, која за пократок рок од предвидениот целосно го реализираше овој проект!

ПОТПИШАН МЕМОРАНДУМ ЗА СОРАБОТКА

На 22 март 2023 година, Факултетот за туризам и бизнис логистика претставуван од деканот проф.д-р Татјана Бошков и Центарот за развој на Југосточниот плански регион претставуван од директорот г-дин Ѓоко Камчев, потпишаа Меморандум за соработка.

Continue reading

Југоисточниот плански регион – центар на дипломатијата!

Во рамки на Економскиот Дипломатски Караван организиран од страна на Министерството за надворешни работи во соработка со Бирото за регионален развој и Центарот за развој на Југоисточниот плански регион со сите десет општини како домаќини на настанот имаа за цел да ги презентираат и промовираат најзначајните проекти за кои општините бараат извори за финансирање.

Исто така покрај проектите од општините во регионот дваесетина извозно ориентирани компании од секоја општина имаа можност да се претстават и да ги запознаат претставниците од Дипломатскиот кор во нашата држава со инвестициските можности и потенцијали на регионот.

Ова беше вистинска можност за компаниите да го претстават своето производство, да ги претстават сопствените можности и Југоисточниот плански регион посериозно да биде ставен на картата на Европа и светот.

30 КОМПАНИИ ОД ЈУГОИСТОЧНИОТ ПЛАНСКИ РЕГИОН СЕ ЗАПОЗНАА СО НАЈНОВИТЕ МЕТОДИ ЗА ДИГИТАЛНА ТРАНСФОРМАЦИЈА

Онлајн маркетингот, продажбата и вештачката интелигенција се три испреплетени полиња кои го револуционизираа начинот на кој бизнисите допираат и се ангажираат со нивните клиенти. Како што се повеќе луѓе се свртуваат кон Интернетот за да донесат одлуки за купување, компаниите мораа да ги приспособат своите стратегии за маркетинг и продажба за да ги задоволат барањата на дигиталната ера. Вештачката интелигенција одигра значајна улога во оваа трансформација, обезбедувајќи им на бизнисите моќни алатки за оптимизирање на нивните напори за онлајн маркетинг и продажба.

Со цел подобро запознавање и адаптација на малите и средните претпријатија со овој вид на маркетинг и продажба, Центарот за развој на Југоисточниот плански регион во рамките на проектот „Деловен екосистем како интегриран систем“, кој е финансиран  преку ИНТЕРЕГ ИПА Програмата помеѓу Р.Грција и Р.С. Македонија организираше две дводневни  работилници на тема НОВА ДИГИТАЛНА РЕАЛНОСТ, кои се одржаа на 13-14 Март и на 16-17 ти март 2023 год. во Хотел Сириус, Струмица.

Работилниците беа наменета за припадниците на бизнис секторот кои сакаат да ја зголемат ефикасноста во работењето со помош на користење на дигитални алатки, сакаат да го унапредат своето онлајн присуство, сакаат да започнат со продавање на своите услуги и производи онлајн, но и да научат нови методи за промоција на своите производи и услуги со цел да бидат поконкурентни не само на нашиот пазар туку и на светско ниво.

Учесниците имаа можност да слушнат нешто повеќе за дигитална трансформација и типови на информациони системи, најкористени системи во процесот на дигиталната трансформација, потребата од креирање на персонализиран софтвер при процесот на трансформација. Потоа, се запознаа со трендовите на дигиталната трансформација, Cloud и Хибридна Cloud околина, Xaas, вештачката интелигенција и машинско учење, како и инвестирање во Cybersecurity  итн.

Проектниот тим преку организацијата на оваа активност посочува до сите компании дека дититалната трансформација не е наменета само за ИТ компаниите, туку во денешно време е нешто што секој бизнис треба да го нуди, претставува потреба и стратешка алатка за раст и развој на компанијата.

 

НОВА ДИГИТАЛНА РЕАЛНОСТ – Работилници во рамките на проектот Би Ин

Основната дигитална трансформација во време кога технологијата е насекаде околу нас е застарена тема.
Од витално значење за секоја компанија денес, од мали до најголеми компании, е да стават акцент на воведување паметни информациони системи во своето работење и максимално да ги модернизираат организациските текови користејќи дигитални алатки кои им се на располагање, за креирање успешна деловна приказна.
Новите навики на потрошувачите бараат иновативен пристап во работењето. Време е да се соочиме со новата дигитална реалност и крајно да ги искористиме бенефитите кои ги нуди.

 

За таа цел, Центарот за развој на Југоисточниот плански регион организира две, дводневни Работилници за дигитална промоција на компаниите од Југоисточниот плански регион преку онлајн маркетинг, промоција и продажба.

Тие се наменети за сите кои се стремат кон дигитална модернизација, за сите бизниси кои бараат нов дигитален начин на промоција, како и нови начини дигитално да ги понудат своите производи и услуги.

Термини на одржување на работилниците:
– 13 и 14 Март 2023 година и
– 16 и 17 Март 2023 година.
Пријавете се за бесплатна работилница на тема НОВА ДИГИТАЛНА РЕАЛНОСТ на следниот линк: .
Бројот на учесници е ограничен.

Станете дел од прекуграничната мрежа за превенција и одговор на природни и еколошки опасности

На завршната конференција одржана од Асоцијацијата на југозападни општини за проектот „Прекугранична соработка во справување со шумски пожари“, имплементиран со поддршка на програмата за соработка Interreg IPА CBC Бугарија – С. Македонија 2014-2020 година, беше потпишан МЕМОРАНДУМ за создавање на прекугранична партнерска мрежа за координација и соодветен одговор на природните и еколошките опасности, со посебен акцент и фокус на шумските пожари.

Мрежата обединува заедница на институции, организации, експерти и индивидуалци од  Република С.Македонија и Република Бугарија кои работат на полето на превенција, подготвеност и брз одговор при природни катастрофи и пожари.

Членовите на мрежата ќе работат на остварување на следните цели:

  • Примање и споделување на информации поврзани со природни катастрофи и пожари
  • Размена на искуство, добри практики и знаење
  • Заедничка обука помеѓу членовите
  • Помош и поддршка при управување со природни катастрофи и пожари
  • Поддршка во опрема (донација и користење)
  • Обезбедување на поддршка и помош за развој на волонтерските друштва
  • Едукација на младите
  • Подигнување на јавната свест кај населението
  • Спроведување на заеднички кампањи и вежби
  • Поддршка во комуникација со регионалните и националните служби за заштита, спасување и управување со кризи
  • Заедничка апликација и реализација на проекти кои се однесуваат на иновации, подобрувања, обуки и други позитивни ефекти во заедничката кауза.

За да станете член на оваа мрежа, потребно е да пополните ПРИСТАПНИЦА за членство и истата да ја испратите на cbc.forest.fire@gmail.com.

Со пополнување и потпишување на пристапницата членовите ги прифаќат начелата и принципите утврдени во Меморандумот за соработка и сакат да учествуват во сите активности на мрежата.

Меморандумот и Пристапницата за пополнување се достапни на следните линкови:

Меморандум за соработка

Пристапница (физички лица)

Пристапница (правни лица)

Прекуграничната соработка во справување со шумски пожари отвора нови перспективи за регионот

Точно пред две години започнавме со имплементација на проектот и пред нас си поставивме неколку цели.

Главна цел беше да ја подобриме функционалноста на противпожарните единици во регионот кои ќе настапат на терен при гаснење на шумски пожари опремени со комплетна опрема. Нашиот амбициозен план со високо зацртани цели го остваривме, но и постигнавме многу поголем успех во реализацијата на проектот.

Имплементацијата на проектот за „Прекугранична соработка во справување со шумски пожари“ финансиран од Европската Унија преку Интеррег ИПА Програмата за прекугранична соработка помеѓу Р. Бугарија и Р. С.Македонија 2014-2020 ќе заврши за помалку од еден месец, но постигнатите резултати во регионот ќе бидат видливи и ќе овозможат ефикасно справување со елементарни непогоди на подолг рок.

Најзначајните постигнати цели од овој проект се 112 комплетно опремените пожарникари од нашиот регион, шестте специјализирани обуки со сертифицирани обучувачи за пожарникарите, кампањата за подигање на јавната свест за намалување на шумските пожари и промовирањето на волонтерството во противпожарната служба.

Најголемата придобивка од овој проект е потпишаниот Меморандум за соработка и создавање на прекугранична мрежа за превенција и одговор на природни и еколошки опасности, помеѓу институции и организации од Југоисточниот плански регион во Република С. Македонија и членките – општини на Асоцијација на Југозападни Општини од Република Бугарија, кој ветува многу продуктивна и навремена комуникација помеѓу институциите – членки на Меморандумот на двете држави чијашто визија е прекугранична мрежа за превенција и справување со природни и еколошки опасности во која се вклучени професионалци и експерти од институции, организации и поединци кои во заедничка координација ќе се справуваат со природните и еколошките опасности во прекуграничниот регион.