Учество на FIREDEFEND на „Forward Green Expo“ во Солун – размена на искуства и унапредување на одржливи практики

На 27 март, проектниот тим на Центарот за развој на Југоисточниот плански регион, како партнер во проектот FIREDEFEND, учествуваше на 4-та Меѓународна изложба за циркуларна економија „Forward Green Expo“, која се одржа во рамки на настанот „Renewable Energy Tech“ во Солун, Грција.

Учеството на овој значаен меѓународен настан овозможи размена на искуства, знаења и добри практики со релевантни институции, експерти и организации од регионот и пошироко, во областа на управување со ризици, заштита на животната средина и одржлив развој. Посебен акцент беше ставен на современите пристапи и иновативни решенија поврзани со циркуларната економија и обновливите извори на енергија.

Преку учеството на изложбата, тимот имаше можност да се запознае со нови технологии, алатки и практики кои придонесуваат кон подобрување на системите за превенција и справување со пожари, како и поефикасно управување со отпад и природни ресурси – теми кои се директно поврзани со целите на проектот FIREDEFEND.

Во рамки на настанот се одржа и партнерска средба на проектот FIREDEFEND, на која беа разгледани досегашните активности, постигнатиот напредок и предизвиците во имплементацијата. Партнерите дискутираа за следните чекори, со цел унапредување на соработката и обезбедување ефективна и навремена реализација на проектните активности.

Учеството на вакви настани придонесува кон зајакнување на регионалната и прекуграничната соработка, како и кон примена на современи решенија за справување со предизвиците поврзани со климатските промени и заштитата на животната средина.

#FIREDEFEND #ForwardGreenExpo #RenewableEnergy #ЦиркуларнаЕкономија #ОдржливРазвој #ClimateAction

📢 Почетен (Kick-off) состанок во рамки на проектот TX4ALL

На 17 март 2026 година, во Солун, Грција, се одржа почетниот (kick-off) состанок во рамки на проектот „Accessibility and inclusion for all to public tourism assets & services“ (TX4ALL), финансиран од Европската Унија преку Интеррег VI-A ИПА Програмата „Грција – Северна Македонија 2021–2027“.

Состанокот беше организиран од водечкиот партнер – Институтот на Националната конфедерација на лица со попреченост (IN-ESAmeA) од Грција, а на истиот учествуваа сите проектни партнери.

Во рамки на состанокот, партнерите ги презентираа своите организации, проектни тимови и планираните активности, со посебен акцент на улогата на секој партнер во реализацијата на проектот. Дополнително, беше направен преглед на проектните работни пакети, комуникациските активности, како и следните чекори за успешна имплементација.

Посебно внимание беше посветено на координацијата помеѓу партнерите, временската рамка за реализација на активностите, како и подготовката и спроведувањето на јавните набавки, кои претставуваат клучен сегмент во проектот.

🔹 Во рамки на проектот, Центарот за развој на Југоисточниот плански регион ќе реализира повеќе активности насочени кон подобрување на пристапноста во туризмот, меѓу кои:

  • создавање на инклузивна плажа на Дојранското Езеро
    • набавка на инклузивно опремено возило
    • изработка на мобилна апликација
    • набавка на електрични возила за разгледување на туристички локации
    • набавка на аудио-базиран систем за лица со оштетен вид
    • поставување на 14 универзално пристапни знаци за насочување
    • инсталација на нов лифт во зградата на Центарот
    • набавка на 18 мобилни рампи за општините во регионот

Проектот TX4ALL претставува значаен чекор кон создавање на подостапен, поинклузивен и одржлив туризам, кој ќе овозможи еднаков пристап до туристичките услуги за сите граѓани.

#TX4ALL #Инклузија #Пристапност #Интеррег #ЕУПроекти

Одржан првиот работен состанок за проектот „Heart Safe CBA“

На 24 март 2026 година официјално започна имплементацијата на проектот „Кон прекугранична област, безбедна за срцето“ (Heart Safe CBA), со одржувањето на првиот работен состанок.

Проектот се реализира во рамките на Програмата за прекугранична соработка Интеррег ИПА Грција – Северна Македонија 2021–2027, кофинансирана од Европската Унија и националните фондови на земјите учеснички.

На настанот присуствуваа претставници од сите партнерски институции – Центарот за развој на Југоисточниот плански регион, Општата болница АХЕПА од Солун и Друштвото за итна претхоспитална нега на Грција. На состанокот беше дискутирано за координација на активностите, дефинирање на следните чекори и зајакнување на прекуграничната соработка во областа на итната медицинска помош.

Проектот предвидува значајни инвестиции во здравствената инфраструктура во Југоисточниот регион. Планирана е набавка и поставување на 18 автоматски (мобилни) дефибрилатори на јавни локации, вклучително општински објекти и граничните премини во Гевгелија, Дојран и Ново Село. Дополнително, ќе бидат обезбедени 6 полуавтоматски дефибрилатори, 6 ЕКГ апарати и 4 целосно опремени амбулантни возила за потребите на здравствените домови.

Посебен акцент на состанокот беше ставен на организацијата на обемна програма за едукација. Во рамки на проектот ќе се реализираат 60 обуки за укажување прва помош со користење на дефибрилатори, наменети за доктори, медицински персонал, вработени во повеќе институции, како и за граѓаните од регионот.

Со реализацијата на овие активности, проектот „Heart Safe CBA“ има за цел да го унапреди системот за итна медицинска помош, да ја зголеми подготвеноста за реагирање при срцеви итни случаи и да придонесе кон создавање побезбедна и поотпорна прекугранична заедница.

Прва работилница во рамки на проектот Зелено за добро G4G – одржана во Солун

На 23 март 2026 година, во просториите на CERTH во Солун се одржа првата работилница на проектот „Зелено за добро“ (G4G), организирана од страна на Центарот за истражување и технологија, Hellas.

На настанот присуствуваа партнерите на проектот – Центарот за развој на Југоисточниот плански регион, ЧИСС Меѓународна соработка Југ Југ подружница Скопје, Центарот за истражување и технологија Хелас и Општина Терми – кои заедно со другите учесници придонесоа кон конструктивна размена на ставови и предлози за одржлив туризам.

Работилницата опфати презентации и интерактивна студија на случај, фокусирана на Солун како стратешка туристичка дестинација, создавајќи простор за дискусија, размислување и споделување практични идеи. Учесниците истражуваа како туризмот може да се развива на поурамнотежен и поодржлив начин, а притоа да одговори и на потребите на локалните заедници и посетителите.

Како прва работилница организирана во рамките на проектот G4G, настанот означи значаен почеток на оваа серија активности и ја истакна вредноста на соработката, размената на знаење и заедничкото дејствување кон поодржливи и поотпорни заедници.

„Прекугранична соработка за рана детекција и превенција на пожари на диви депонии“

На 6 март 2026 година во Солун Грција, се одржа почетниот состанок на проектот FIREDEFEND – Fire Detection and Enhanced Fire Emergency Network for Waste Disposal, со кој официјално започна имплементацијата на проектните активности.

Во рамки на состанокот, партнерите ги претставија своите организации и проектни тимови како и планираните активности и работни пакети. Беа разгледани клучните аспекти на управувањето со проектот, финансиските и административните правила, комуникациските обврски, како и следните чекори за успешна реализација на проектот.

Проектот има за цел подобрување на системите за рана детекција на пожари на депонии и зајакнување на капацитетите за превенција и управување со ризици, преку инсталирање пилот системи за рано откривање на пожари и размена на искуства и добри практики помеѓу партнерите од Грција и Северна Македонија.

Во рамки на настанот беше организирана и студиска посета на Еколошкиот Парк Терми-Панорама, кој претставува успешен пример за трансформација на поранешна неконтролирана депонија во современ еколошки парк.

Изразуваме искрена благодарност до нашите Водечки Партнери – FoDSA (Regional Association of Solid Waste Management Agencies in Central Macedonia) за одличната организација и гостопримството.

Проектот FIREDEFEND се имплементира во рамките на Interreg VI-A IPA Programme Greece – North Macedonia 2021–2027, кофинансиран од Европска Унија и националните фондови на земјите учеснички.

#FIREDEFEND #Interreg #CrossBorderCooperation #Environment #FirePrevention

Успешно реализирана прес-конференција за проектот „Зелено за добро“ (G4G)

На 04 март 2026 година, во Хотел „Сириус“ – Струмица, се одржа првата прес-конференција за проектот „Зелено за добро“ (Green for Good – G4G), што се реализира во рамки на Интеррег VI-A ИПА Програмата „Грција – Северна Македонија 2021–2027“. Проектот е кофинансиран од Европската Унија и националните фондови на земјите учеснички.
Настанот беше организиран од Центарот за развој на Југоисточниот плански регион, со присуство на претставници на проектот, институции, владини претставници и медиуми.
Изјави за медиумите дадоа Златко Перински – министер за локална самоуправа, Петар Јанков – претседател на Советот за развој на Југоисточниот плански регион / градоначалник на Општина Струмица и Јован Коцев – в.д. директор на ЦРЈИПР, по што следуваа нивни поздравни обраќања, заедно со обраќање од Горан Бошков – претставник од CISS. Во своето обраќање, в.д. директорот на ЦРЈИПР, Јован Коцев, истакна: „Вредноста на овој проект, не е само во поединечните активности туку и во основата што ја поставува за долгорочни промени. Тој го зајакнува капацитетот на регионот да планира и да инвестира стратешки, со подобра координација меѓу општините и усогласување со националните политики и европските програми.“
Во продолжение беше презентиран проектот „Зелено за добро“ (G4G) и беше прикажано промотивно видео. Проектот е насочен кон намалување на загадувањето и подобрување на квалитетот на воздухот; поголема употреба на обновлива енергија и воведување на паметно управување со енергијата; унапредување на одржлива мобилност; развој на зелена урбана инфраструктура и еколошко образование; како и зајакнување на прекуграничната соработка преку заеднички иницијативи и структури на управување.
Во рамки на проектот се планираат и конкретни активности и инвестиции, меѓу кои поставување на 8 станици за брзо полнење електрични возила во прекуграничниот регион, инсталација на фотоволтаични системи во повеќе општини и воспоставување Центри за зелено образование со цел долгорочни и одржливи придобивки за заедницата.
Настанот заврши со сесија прашања и одговори и конструктивна дискусија за наредните активности и следните чекори во имплементацијата на проектот.

           

Одржана IV седница на Советот за развој на ЈИПР

Во просториите на Центарот за развој на Југоисточниот плански регион во Струмица се одржа IV седница на Советот за развој на Југоисточниот плански регион, со која претседаваше градоначалникот Петар Јанков.
На седницата беа разгледани и усвоени повеќе точки од значење за понатамошниот развој на регионот, со посебен акцент на актуелните отворени повици за финансирање на проекти од национален интерес.
Советот го разгледа Повикот за финансирање предлог-проекти за намалување на диспаритетите меѓу и во рамките на планските региони и зголемување на регионалната конкурентност за 2026 година, објавен од Министерството за локална самоуправа, со вкупен буџет од 74.840.000 денари, наменет за сите осум центри за развој во Република Северна Македонија. По разгледување на приоритетите, членовите на Советот едногласно донесоа одлука за аплицирање со проект за набавка на комунално возило за општина Валандово.
Воедно беше разгледан и повикот од Бирото за регионален развој, со вкупен износ од 81.545.150 денари за финансирање проекти во планските региони. Согласно Одлуката за класификација на планските региони според степенот на развиеност за периодот 2024–2028 година, за Центарот за развој на ЈИПР се предвидени околу 10.200.000 денари. Во рамки на овој повик беше донесена одлука за аплицирање со проект за набавка на комунално возило за општина Струмица, како и проект за изградба на пат во населеното место Старо Владиевци, до црквата „Успение на Пресвета Богородица“ во општина Василево.
Сите општини ќе учествуваат со сопствено кофинансирање, со што дополнително се потврдува заедничката посветеност кон реализација на приоритетните проекти.
Со донесените одлуки, Советот ја нагласи потребата од координиран и стратешки пристап во користењето на расположливите финансиски средства, со цел унапредување на инфраструктурата, подобрување на комуналните услуги и обезбедување рамномерен развој на целиот Југоисточен плански регион.