Oдржан четвртиот работен состанок во рамки на проектот “COMBINE2PROTECT”

Во рамките на проектот “Заеднички стратегии за заштита на биолошката разновидност и одржлив развој на билатералнaта мрежа на заштитени подрачја – COMBINE2PROTECT” финансиран од Европската Унија преку Интеррег ИПА Програмата за прекугранична соработка помеѓу Грција и Р.Северна Македонија на 17ти мај (понеделник)  се одржа четвртиот работен состанок онлајн преку платформата ЗООМ.

На состанокот присуствуваа претставници од: Центарот за развој на Југоисточниот плански регион, Универзитетот “Аристотел” во Солун, Грција, Државниот инспекторат за животна средина од Република Северна Македонија, Регионот на западна Македонија од Флорина, Грција како и македонски експерти од областа на биодиверзитетот.

На состанокот беше презентирaна Регионалната Стратегија за Биодиверзитет во Југоисточниот плански регион, Студијата за прецизно утврдување на Моноспитовското блато и Студијата за квалитетот на водата заснована на микроорганизми; Документарни филмови кои опфаќаат делови од прекуграничниот регион и Програмата Greenium за брендирање на бизниси во рамки на проектот. Исто така се разговараше и за организирањето на следните настани како интернационалните конференции за биодиверзитет, состаноците за размена на експертиза и обуките за биодиверзитет кои ќе следат во рамки на проектот и кои поради ситуацијата со пандемијата Ковид19 немаше можност да се реализираат во предвидениот временски период.

Последниот работен состанок на проектниот тим се планира да се одржи во Флорина.

Овој проект е кофинансиран од Европската Унија и Националните фондови на земјите учеснички

Второ прскање против ларвициди по земјен пат во општините во Југоисточниот регион

Центарот за развој на Југоисточниот плански регион во соработка со десетте општини од регионот започна со активности за третирање против ларвицидна и возрасна форма на комарци по земјен пат. Предвидени се две третирања за ларвициди и три третирања против возрасни комарци на територијата на Југоисточниот регион со вкупна површина од 5.376 ха.

Се известуваат сите граѓани на десетте општини во Југоисточниот плански регион дека второто ларвицидно прскање ќе се изврши во период од 17 до 19 Мај 2021 година, со следниот распоред:

  1. На 17.05.2021 година (Понеделник), во период од 09 до 16 часот во општините Валандово, Дојран, Гевгелија и Богданци.
  2. На 18.05.2021 година (Вторник), во период од 09 до 16 часот во општините Ново Село, Босилово, Василево и Струмица.
  3. На 19.05.2021 година (Среда), во период од 09 до 16 часот во општините Радовиш и Конче.

Се известуваат сопствениците на пчелни семејства да преземат соодветни мерки за заштита, односно да ги затворат истите во најавениот временски период.

Промоција на социјално инклузивни проекти финансирани од Швајцарската Агенција за развој и соработка и Министерството за локална самоуправа

На 05 мај 2021 година, Центарот за развој на Југоисточниот плански регион на две локации во Струмица и Радовиш ги промовираше проектите: „Академија за реинтеграција на маргинализирани лица“ и „Создавање на услови за поголема социјална инклузија на лицата со посебни потреби во Југоисточниот плански регион“, реализирани со финансиска поддршка од Швајцарската Агенција за развој и соработка и Министерството за локална самоуправа.

Гости на настанот беа Министерот за локална самоуправа на Република Северна Македонија, Г-н Горан Милевски, претставници од Швајцарската Агенција за развој и соработка, претставници од Центарот за развој на Југоисточниот плански регион како и Градоначалникот на општина Радовиш, г-н Герасим Конзулов.

Настанот започна со посета на терен во Здружението за советување, лекување, реинтеграција и ресоцијализација на лица зависни од психоактивни супстанци – ИЗБОР во Струмица, со чиешто партнерство Центарот за развој на Југоисточниот плански регион го имплементираше проектот „Академија за реинтеграција на маргинализирани лица“.

Како резултат на овој проект се унапредија постоечките услуги во Југоисточниот регион за подобро вклучување на маргинализираните лица на пазарот на трудот преку набавка на опрема наменета за органско производство на овошје и зеленчук, пекарство, пакување и етикетирање на прашкасти и зрнести производи, градинарство и цвеќарство.

“Со помош на набавената опрема социјално загрозените лица имаат можност да се стекнат со вештини кои ќе придонесат да бидат самостојни, корисни во општеството и квалификувани на пазарот на трудот. Преку овој проект исто така се овозможи вработување на три лица кои стекнаа работни вештини во рамки на Програмата за реинтеграција, а во наредниот период се очекуваат дополнителни вработувања на лица кои се веќе во фаза на рехабилитиација во Здружението – ИЗБОР“ – изјави Г-а Данче Поп-Иванова Илиева, координатор на проектот.

Промоцијата продолжи во Дневниот Центар за лица со попреченост во општина Радовиш, кој е еден од четирите опремени Дневни Центри во регионот со реквизити и опрема за работна окупација, психомоторен развој и достапност преку проектот „Создавање на услови за поголема социјална инклузија на лицата со посебни потреби во Југоисточниот плански регион“ кој се имплементираше од страна на Центарот за развој на Југоисточниот плански регион.

Овој проект придонесува кон подигање на свеста за вклучување на лицата со различни попречености во општествениот и социјалниот живот во регионот како и подобрување на секојдневниот престој во Дневните Центри преку набавената опрема и стекнатите знаења кои ќе овозможат долгорочни промени во однос на нивно работно оспособување и вклученост на пазарот на трудот.

Станува збор за два успешно реализирани проекти кои беа избрани на партиципативен начин со директно учество на граѓаните од Југоисточниот регион преку Грантовата шема за иновативни и инвестициски проекти овозможени преку проектот „Одржлив и инклузивен рамномерен регионален развој“ и во иднина ќе служат за пример како еден регион е потребно да се развива одржливо во областа на социјалната инклузија.

Заврши асфалтирањето на локален пат Зубово – спој со пат Ново Село -Мокриево

Успешно заврши имплементацијата на проектот „Изградба на локален пат Зубово-спој со пат Ново Село-Мокриево“ во должина од 907 метри, кој се реализираше од страна на Центарот за развој на Југоисточниот плански регион во партнерство со општина Ново Село и истиот е ставен во употреба.

Со асфалтирањето на локален пат Зубово – спој со пат Ново Село – Мокриево ќе се овозможи поврзување на населените места по асфалтен пат со што ќе се избегне заобиколувањето кое досега го правеа жителите за да стигнат од едно до друго населено место. Со овој проект на граѓаните им се овозможи подобрување на меѓусебна комуникација и условите за живот, пристапот до своите домови, училишта, работни места, земјоделски површини, откупни центри како и подобар пристап до туристичките места во Подбеласичкиот регион.

Проектот е финансиран од Програмата за финансиска поддршка на руралниот развој за 2018 година, преку Агенцијата за финансиска поддршка во земјоделството и руралниот развој според мерка 321 Подобрување на квалитетот на живот во руралните средини, подмерка 321.1 Инвестиции во локална патна инфраструктура за поврзување меѓу две или повеќе населени места во рурални средини како и од Буџетот на општина Ново Село.

Градежните работи за проектот ги изврши економскиот оператор „ДГТУП ЏОВИ КОМПАНИ ДООЕЛ“ с.Мокрино, општина Ново Село со вкупна вредност од 4.709.732,82 денари со вклучен ДДВ.

Осовременувањето на овој локален пат ќе ја подобри комуникацијата помеѓу споменатите населените места, како и околните населени места од овој микро-регион со што значително се подобрува локалната патна инфраструктура во Југоисточниот плански регион.

ФИТР со нов јавен повик – СТАРТАПУВАЈ 3

ФИТР објавува нов јавен повик со важни новитети: Кофинансирани грантови за новоосновани трговски друштва старт-ап и спин-оф – СТАРТАПУВАЈ 3.

Старт-ап и спин-оф компаниите, своите иновативни идеи сега може да ги реализираат преку олеснет пристап до финансиски средства и подобрени услови за финансирање. Преку овој повик Фондот ќе обезбеди неповратни средства до:

  • 40.000 евра (90%) од вкупниот буџет на проект за трговски друштва до 3 години постоење, односно
  • 60.000 евра (85%) од вкупниот буџет на проект за трговски друштва со над 3, а помалку од 6 години постоење.

За прв пат, може да аплицира и тим кој се состои од најмногу 5 членови – физички лица. Во овој случај, доколку нивниот проект биде избран за финансирање, тие ќе имаат обврска во рок од 30 дена по прием на Известувањето за селекција на предлог проектот, да регистрираат старт-ап во кое како основачи ќе се јавуваат најмалку 51% од членовите на тимот.

Сите заинтересирани може да аплицираат се до 12-ти јуни 2021 година, до 14.00 часот.

За начинот на аплицирање и други подетални информации на следниот линк: https://fitr.mk/startapuvaj3/

Усвоена Програмата за развој на Југоисточниот плански регион за период од 2021 – 2026 година

На 15.04.2021 се одржа дваесет и седмата (XXVII) редовна седница на Советот за развој на Југоисточниот плански регион, на која раководителот на Центарот за развој на ЈИПР, Г-а Жулиета Ѓуркова пред присутните ја презентираше Програмата за развој на Југоисточниот плански регион за период од 2021-2026 година.

Изработката на новата Програма за развој на Југоисточниот плански регион 2021-2026 се темели на несебичната вклученост на сите засегнати страни од јавниот, приватниот и граѓанскиот сектор, а посебно од вработените во одделенијата за Локален Економски Развој во општините од Југоисточниот плански регион, со цел создавање на еден квалитетен среднорочен стратешки документ и основа за идна соработка и заедничка имплементација на Програмата.

По претходната согласност од страна на Советот за рамномерен регионален развој на Република Северна Македонија, Програмата за развој на Југоисточниот плански регион за период од 2021 – 2026 година беше едногласно усвоена од Советот за развој на Југоисточниот плански регион.

Подготовката и содржината на Програмата е целосно изработена во согласност со рамката и содржината на Правилникот за методологијата за изработка на планските документи за регионален развој, донесен од страна на Министерството за локална самоуправа и е усогласена со Стратегијата за регионален развој на Република Северна Македонија 2021 – 2031.

Процесот на изготвување на Програмата за развој на Југоисточниот плански регион е поддржан од Министерството за локална самоуправа преку проектот „Одржлив и инклузивен рамномерен регионален развој“, кој се спроведува со поддршка на Швајцарската Агенција за развој и соработка во Република Северна Македонија.

Програмата може да ја најдете на следниов линк.

 

Започнува третирањето против ларвицидни и возрасни комарци во општините од Југоисточниот плански регион

Центарот за развој на Југоисточниот плански регион во соработка со десетте општини од регионот започнува со активности за третирање против ларвицидна и возрасна форма на комарци по земјен пат. Предвидени се две третирања за ларвициди и три третирања против возрасни комарци на територијата на Југоисточниот регион со вкупна површина од 5.376 ха.

Се известуваат сите граѓани на десетте општини во Југоисточниот плански регион дека првото ларвицидно прскање ќе се изврши во период од 20 до 22 Април 2021 година, со следниот распоред:

  1. На 20.04.2021 година (Вторник), во период од 09 до 16 часот во општините Валандово, Дојран, Гевгелија и Богданци.
  2. На 21.04.2021 година (Среда), во период од 09 до 16 часот во општините Ново Село, Босилово, Василево и Струмица.
  3. На 22.04.2021 година (Четврток), во период од 09 до 16 часот во општините Радовиш и Конче.

Се известуваат сопствениците на пчелни семејства да преземат соодветни мерки за заштита, односно да ги затворат истите во најавениот временски период.

Потпишан Договор за предавање на користење и одржување на Командниот центар набавен во рамките на проектот HELP

Денеска на 30.03.2021 година, во просториите на Центарот за развој на Југоисточниот плански регион во Струмица, Раководителот на Центарот за развој на Југоисточниот плански регион, Г-а Жулиета Ѓуркова и Директорот на Центарот за управување со кризи, Г-н Стојанче Ангелов потпишаа Договор за давање на користење, одржување и сервисирање на Командниот центар набавен во рамките на проектот „Интегриран оперативен центар за хуманитарна помош“ – HELP.
Претходно, претставници од двете институции беа во посета на Регионалниот Центар за управување со кризи, РЦУК Струмица, каде што е поставен самиот Команден Центар со цел да се разгледа поставената опрема, а беше направена и кратка презентација за можностите кои ги има опремата и за тоа како истиот ќе се користи во услови на елементарни непогоди во државата и во прекуграничниот регион со Грција.
Центарот за развој на ЈИПР во изминатиот период интензивно работеше кон остварување на главната цел на проектот односно обезбедување на современа инфраструктура и опрема за управување со кризи, а резултатите се видливи со самото поставување на целосно опремен Команден Центар кој неодамна се постави токму во Југоисточниот плански регион, во Струмица.
„Овој Команден Центар ќе служи не само за Југоисточниот регион, туку секаде каде што има потреба во државата ќе биде транспортиран од причини што ваквиот софистициран контејнер е прв од таков вид направен во нашата држава и се надевам дека ова ќе биде успешен пример на прекугранична соработка со Грција со надеж во иднина ваков проект да спроведеме и со Р. Бугарија со цел побрза интервенција и заштита на граѓаните во целиот прекуграничен регион“, истакна Г-а Ѓуркова во своето обраќање.
Согласно предвидените активности до крајот на имплементацијата на проектот заедно со проектните партнери ќе се спроведат две Пилот-акции, една во нашиот регион и една во Грција за време на кои ќе се креира виртуелно сценарио за одредена непогода во прекуграничниот регион, ќе се претстави начинот на брзо реагирање и комуницирање со прекуграничната област овозможено преку Командниот центар. Исто така планирано е и организирање на еден Инфо ден за презентирање на постигнатите резултати во рамки на проектот.
Проектот е кофинансиран од Европска Унија преку Интеррег ИПА Програмата за прекугранична соработка помеѓу Р. Северна Македонија и Грција и националните фондови на земјите учеснички.

Проектот „Академија за реинтеграција на маргинализирани лица“ е пример како еден регион да се развива одржливо во областа на социјалната инклузија

Креирање на еднакви можности за социјално загрозените лица при вработување, подобрување на услугите кои се нудат во регионот преку Програма за реинтеграција во општеството, можности за дообразување, стручно усовршување и други форми на учење низ работење со современи машини за производство на храна. Тоа се дел од резултатите кои се постигнаа преку проектот кој го имплементираше Центарот за развој на Југоисточниот плански регион во партнерство со Здружение за советување, лекување, реинтеграција и ресоцијализација на лица зависни од психоактивни супстанци – „ИЗБОР“.

Идејата беше Програмата за реинтеграција на социјално загрозени лица која се нуди во регионот да се збогати со современи ресурси кои ќе помогнат во создавање на услови за одржлив развој преку непречено испорачување на услугите и производите кон крајните корисници: ранливите групи на граѓани кои имаат потреба од обуки и вработување, компаниите кои имаат потреба од оспособени работници и купувачите кои имаат потреба од квалитетни и безбедни органски земјоделски и пекарски производи.

Токму тоа се овозможи преку самата имплементација на проектот, се унапредија постоечките услуги во Југоисточниот регион за подобро вклучување на маргинализираните лица на пазарот на трудот преку набавка на опрема наменета за органско производство на овошје и зеленчук, пекарство, пакување и етикетирање на прашкасти и зрнести производи, градинарство и цвеќарство. Со помош на набавената опрема и Програмите кои ги нуди Здружението „ИЗБОР“, социјално загрозените лица имаат можност да се стекнат со вештини кои ќе придонесат да бидат самостојни, корисни во општеството и квалификувани на пазарот на трудот.

За време на периодот на имплементација исто така се овозможи вработување на три лица кои стекнуваат работни вештини во рамки на Програмата за реинтеграција, а во наредниот период се очекуваат дополнителни вработувања на лица кои се веќе во фаза на рехабилитиација во Здружението „ИЗБОР“.

Ваквиот пристап на делување во потполност одговара на приоритетите и стратегиите на ЕУ во борбата против социјалната исклученост преку обезбедување на квалитетни работни места, подобар и поквалитетен живот за ранливите групи и на лицата кои заради својот стил на живот се подолго време на листата на невработени.

„Академија за реинтеграција на маргинализирани лица“ се имплементираше девет месеци во рамки на проектот „Одржлив и инклузивен рамномерен регионален развој“ финансиран од Министерство за локална самоуправа и Швајцарска Агенција за развој и соработка.

Комплетно нова опрема за пожарникарите од регионот за справување со шумски пожари

Центарот за развој на Југоисточниот плански регион започна со имплементација на проектот „Прекугранична соработка во справување со шумски пожари” во рамки на Програмата за прекугранична соработка Р. Бугарија – Р. Северна Македонија 2014 – 2020. Центарот за развој на Југоисточниот плански регион ќе го спроведува проектот во партнерство со Асоцијацијата на Југозападни општини од Балгоевград, Република Бугарија, кој е Лидер партнер во имплементација на проектот.

Во рамките на овој проект ќе биде набавена комплетна лична заштитна опрема за шумски пожари за сите пожарникари од Југоисточниот плански регион, со која во моментов не располага ниту една од противпожарните единици од регионот. Ќе се набави професионална опрема за шумски пожари која вклучува комбинезони, ќебиња, чизми, ракавици, шлемови направени специјално за шумски пожари, заштитни маски против чад и балаклави огноотпорни маски. За секоја од противпожарните единици во регионот ќе се набават пумпи, противпожарни црева и моторни пили. Со оваа опрема значајно ќе се унапреди безбедноста и функционалноста на пожарникарите од регионот и нивен навремен и соодветен одговор против шумските пожари кои предизвикуваат огромни штети, ја уништуваат нашата шума, природата, а не ретко како што е познато од минатото има и човечки жртви.

Покрај набавката на опрема ќе се креира и прекугранична мрежа за спречување и одговор на опасности од природата и животната средина во која ќе учествуваат претставници на општинските територијални противпожарни единици и волонтерските заедници од двете земји чија цел е да се создаде добра координација и структура за превенција и соодветен одговор на катастрофите со посебен акцент на шумските пожари. За дел од членовите на мрежата е предвидено спроведување на низа обуки (вкупно 6) од страна на меѓународни сертифицирани обучувачи. Ќе се спроведе и информативна и медиумска кампања за промовирање на волонтерство и спречување на шумските пожари.

Проектот е со вкупна вредност од 395.361 евра, од кои буџетот на Центарот за развој на Југоисточниот плански регион е 197.602 евра, а истиот ќе се имплементира 24 месеци.