Центарот за развој на Југоисточниот плански регион потпиша Меморандум за соработка за изработка на новиот Просторен план на РСМ

Министерот за животна средина и просторно плaнирање, Г-н.Насер Нуредини, директорот на Агенцијата за планирање на просторот, Г-а.Андријана Андреева и раководителот на Центарот за развој на Југоисточниот плански регион, Г-а.Жулиета Ѓуркова на 15.03.2021 во Свечената сала во Владата на РСМ потпишаа Меморандум за соработка, со кој сите страни ја изразија подготвеноста за соработка во процесот на изработка на  Просторен план на Република Северна Македонија.

Просторниот план на РСМ претставува национална стратегија за просторен развој и дава насоки за организација, користење, заштита, уредување и управување со просторот на Државата. Потребата за изработка на нов просторен план произлегува од истекувањето на постојниот плански документ, но и заради промената во условите и современите потреби на нашето општество.

– Новиот Просторен план на Државата ќе биде современ и визионерски и ќе овозможи долгорочен и одржлив социо-економски развој,  превенција и контрола на неговото штетно влијание врз животната средина и ќе воспостави баланс помеѓу расположивиот простор, економскиот и демографскиот развој, природните и културните ресурси. Исто така, со новата методологија се предвидуваат и механизми за справување со климатските промени како и усогласување на секторските политики и наоѓање на најсоодветни решенија – истакна во таа прилика министерот Нуредини.

Важна улога во планирањето на просторот ќе имаат и планските региони и нивното учество во овој процес што произлегува не само од фактот што секој плански регион ќе изработи посебен просторен план како разработка на националниот, туку и поради улогата во напорите за постигнување на рамномерен регионален развој во државата.

Нарачател на Планот е Министерството за животна средина и просторно плaнирање, кое ја координира целата постапка за изработка и ги спроведува процедурите на донесување на Планот согласно Законската регулатива и Методологијата за изработка на Просторниот план, додека изработувач на Просторниот план е Агенцијата за планирање на просторот.

Апликација за менторска поддршка за фирми и ПЗУ кои ќе аплицираат преку новиот повик на ФИТР

Бизнис Центарот при Центарот за развој на Југоисточниот плански регион во рамките на Ваучерската шема за давање стручна помош овозможува БЕСПЛАТНА МЕНТОРСКА ПОДДРШКА за сите фирми и Приватни здравствени установи (ПЗУ) кои се заинтересирани да аплицираат преку новиот повик објавен од страна на ФИТР за Кoфинансирани грантови за технолошки развој за забрзан економски раст достапен на следниов линк: https://fitr.mk/zabrzan-ekonomski-rast/.

Преку пополнување на апликацијата фирмите и Приватните здравствени установи од Југоисточниот регион се стекнуваат со право за добивање на менторска поддршка, а поради ограничен износ на средства, редоследот на корисниците на менторската поддршка ќе се определува по принципот прв пријавен, прв услужен.

Линк за аплицирање за добивање менторска поддршка: https://forms.gle/Bz5mrWXzARJK1Biy9

За дополнителни информации обратете се во Бизнис центарот при Центарот за развој на Југоисточниот плански регион, на ул. Маршал Тито бр. 1-1, Струмица или побарајте не на 034/340-139.

 

Продолжен рокот за поднесување на документи за конкурсот за ангажирање на проектен координатор

Се продолжува рокот за поднесување на документи за конкурсот за ангажирање на еден проектен координатор за потребите на проектот „Прекугранична соработка во справување со шумски пожари“ финансиран од Европската Унија преку Интеррег ИПА Програмата за прекугранична соработка помеѓу Република Бугарија и Република Северна Македонија 2014-2020.

Заинтересираните кандидати за горенаведената работна позиција својот интерес можат да го најават со доставување на кратка биографија (CV), мотивационо писмо на англиски јазик, копија од Диплома за завршено образование, како и дополнителни документи за докажување на  критериумите од конкурсот, со назнака „По конкурс за проект Прекугранична соработка во справување со шумски пожари“, најдоцна до 05.03.2021 година (петок), до 16.00 часот, во просториите на Центарот за развој на Југоисточниот плански регион, Бул. „Маршал Тито” бр. 1-1, 2400 Струмица.      

Целосниот текст на конкурсот како и прилозите може да се превземат од следниве линкови:

1. Конкурс по проект „Прекугранична соработка во справување со шумски пожари“
2. Прилог 1 – Работни задачи на проектен координатор
3. Прилог 2 – Europass CV
4. Прилог 3 – Прирачник за имплементација на проекти

Мостот што ги поврзува селата Просениково и Сарај е во завршна фаза на изградба

Со започнување на активностите околу асфалтирањето на мостот и пристапните патишта, изградбата на мостот помеѓу населените места Просениково и Сарај е во завршна фаза и се очекува комплетно градежните работи да завршат за околу една недела, кога и официјално истиот ќе се пушти во употреба. Должината на мостот изнесува околу 25 метри, а заедно со пристапните патишта вкупната должина изнесува околу 215 метри.

Овој мост е од големо значење првенствено за жителите од двете села со што ќе се олесни нивната секојдневна комуникација, за земјоделските производители кои секојдневно го поминуваат мостот за да стигнат до своите земјоделски површини, но и за транспорт на своите производи до пазарите на големо, како и за сите граѓани од општините Струмица, Босилово и Василево.

Осовременување на патниот правец Просениково – Сарај преку изградба на мост на река Турија води кон подобрување на патната инфраструктура во општините Струмица и Босилово и подобрување на условите за живот на граѓаните во овој дел од регион со што се овозможува поголем економски развој на општините, а воедно и на целиот Југоисточен регион.

Изградбата на мостот е дел од проектот „Изградба на мост на река Турија на локален пат с. Просениково – с. Сарај“ кој Центарот за развој на Југоисточниот плански регион го имплементира во партнерство со општина Струмица, а финансиските средства за негова имплементација се обезбедени од Бирото за регионален развој – Министерство за локална самоуправа и општина Струмица.

Повеќе информации за проектот: https://southeast.mk/portfolio/.

Kонкурс за ангажирање на еден проектен координатор

Центарот за развој на Југоисточниот плански регион објавува конкурс за ангажирање на еден проектен координатор за потребите на проектот „Прекугранична соработка во справување со шумски пожари“ финансиран од Европската Унија преку Интеррег ИПА Програмата за прекугранична соработка помеѓу Република Бугарија и Република Северна Македонија 2014-2020.

Заинтересираните кандидати за горенаведената работна позиција својот интерес можат да го најават со доставување на кратка биографија (CV), мотивационо писмо на англиски јазик, копија од Диплома за завршено образование, како и дополнителни документи за докажување на  критериумите од конкурсот, со назнака „По конкурс за проект Прекугранична соработка во справување со шумски пожари“, најдоцна до 26.02.2021 година (петок), до 16.00 часот, во просториите на Центарот за развој на Југоисточниот плански регион, Бул. „Маршал Тито” бр. 1-1, 2400 Струмица.      

Целосниот текст на конкурсот како и прилозите може да се превземат од следниве линкови:

1. Конкурс по проект „Прекугранична соработка во справување со шумски пожари“
2. Прилог 1 – Работни задачи на проектен координатор
3. Прилог 2 – Europass CV
4. Прилог 3 – Прирачник за имплементација на проекти

Бизнис Центарот во поддршка на МСП од регионот за користење на средства од Фондот за иновации и технолошки развој

Бизнис Центарот кој е формиран во рамки на Центарот за развој на Југоисточниот плански регион и функционира како регионална канцеларија која нуди поддршка на приватниот сектор,  во иднина ќе ја интензивира соработка со Фондот за иновации и технолошки развој  (ФИТР), со тоа што ќе ги информира потенцијалните корисници за сите јавни повици на Фондот и ќе обезбедува техничка поддршка на потенцијалните апликанти од Југоисточниот плански регион.

Ваквата меѓусебна соработка на Бизнис Центарот со ФИТР е со цел заеднички да им се помогне на малите и на средните претпријатија од Југоисточниот плански регион полесно да пристапат до буџетските средства кои што се наменети за нивна поддршка и развој. Како резулатат и продолжување на долгогодишната меѓусебна соработка во следниот период Центарот за развој на ЈИПР и ФИТР ќе организираат  информативни денови како и дополнителна поддршка на сите заинтересирани мали и средни претпријатија од регионот.

Предвидена е ваучерска програма на Бизнис Центарот за градење на капацитетите на претпријатијата и истата се спроведува преку проектот „Одржлив и инклузивен рамномерен регионален развој“, финансиски поддржан од Министерството за локална самоуправа и Швајцарската Агенција за развој и соработка во Р.Северна Македонија, со цел на овој начин да се поддржи развојот и економскиот раст во регионот, да се поттикне зголемувањето на бројот  на нови работни места и да се овозможи подобар стандард за живеење во ЈИПР.

Ги повикуваме сите заинтересирани компании редовно да се информираат и да ги следат информациите кои се објавуваат на социјалните мрежи од страна на Центарот за развој на ЈИПР како и Бизнис Центарот при Центар за развој на ЈИПР:

 

Одржана дваесет и петтата (XXV) седница на Советот за развој на Југоисточниот плански регион

На 02.02.2021 година се одржа дваесет и петтата (XXV) седница на Советот за развој на Југоисточниот плански регион, која поради пандемијата Ковид-19, беше одржана онлајн, преку ZOOM платформата. На седницата беа вклучени градоначалниците на општините од регионот и Директорката на Центарот за развој на Југоисточниот плански регион.

На седницата главно се разговараше за начинот на третирање на комарци на териториите на општините во Југоисточниот плански регион за 2021 година. Беше донесена Одлука за взаемна активност на општините за третирање на комарци во 2021 година по земјен пат, врз основа на која ќе се извршат две ларвицидни и три адлутни третирања против комарци, односно три теристички аеросолни дезинсекциии против возрасни комарци со УЛВ метода и две ларвицидни дезинсекции на териториите на десетте општини од регионот.
Оваа Одлука се донесе порано со цел да се запазат роковите и препораките од Центрите за јавно здравје за навремено прскање против комарци и да се следат препорачаните интервали на прскање и третирање за да се зголеми ефикасноста, да се добие најдобар резултат од овој процес и да се заштити здравјето на граѓаните од нашиот регион.

Во исто време се донесе заклучок да се бара од Министерството за транспорт и врски да ја вклучи површината на Моноспитовско блато во локациите кои се приоритетни за прскање против комарци од страна на Министерството како примерот за Дојранското Езеро од нашиот регион. Имено поради недостапноста на теренот нема можност да се изведе теристичка (од земја) аеросолна дезинсекција, а од друга страна оваа блато претставува најголем извор на комарци во овој регион.

На дваесет и петтата седница на Совет на ЈИПР беа донесени и едногласно усвоени и Одлуките за продажба на старото службено моторно возило и за купување на ново службено моторно возило за потребите на Центарот за развој на Југоисточнот плански регион.

На оваа седница беше утврдена и висината на средствата кои секоја од општините од регионот ќе ги одделува на годишно ниво за финансирање и непречено работење на Јавното претпријатие за заловување на бездомни кучиња „Астра – Луна“ – Струмица, за што беше донесена Одлука од страна на Советот.

Усвоени Финансискиот план за работа на ЦРЈИПР и Акциониот план за спроведување на Програмата за рамномерен регионален развој на Југоисточниот плански регион за 2021 година

На 30.12.2020 година поради пандемијата Ковид-19, преку ЗООМ платформата, онлајн се одржа XXIV (дваесет и четвртата) и последна Седница на Советот за развој на Југоисточниот плански регион за 2020 година, на која присуствуваа градоначалниците на општините од регионот и Раководителот на Центарот за развој на Југоисточниот плански регион.

Пред присутните градоначалници, Раководителот на Центарот Г-а Жулиета Ѓуркова ги презентираше Предлог Финансискиот план за работа на Центарот за развој на Југоисточниот плански регион за 2021 година, како и Предлог Акциониот план за 2021 година за спроведување на Програмата за рамномерен регионален развој на Југоисточниот плански регион кои на седницата едногласно беа усвоени.

На оваа Седница исто така беа донесени и едногласно усвоени и одлуките за примопредавање и преотстапување на користење и одржување на локален пат с.Бориево – с.Колешино на општина Босилово и општина Ново Село; Одлуката за примопредавање и преотстапување на користење и одржување на локален патен правец од Клучка со Р 604 пат Струмица – Дојран со клучка П-611 пат Валандово – Гевгелија на општина Дојран и Одлуките за примопредавање и преотстапување на користење и одржување на пат Богородица – Стојаково, крстосница со регионален пат Гевгелија – Богородица прва фаза на општина Богданци и втора фаза на општина Гевгелија.

ИНФОРМАТИВЕН ВОДИЧ – ЗБИРКА НА ДОБРИ ПРАКТИКИ ЗА СПРАВУВАЊЕ СО ПОСЛЕДИЦИТЕ ОД КЛИМАТСКИ ПРОМЕНИ ВО ЗАЕДНИЦИТЕ

Негативните последици настанати како резултат на климатските промени се одвиваат на глобално ниво и се повеќе влијаат врз секојдневниот живот на луѓето.

Размената на добри практики и искуство помеѓу локалните заедници и регионите во различни земји во областа на справување со последиците од климатските промени е клучна за постигнување одржливи резултати, како на локално, така и на регионално и национално ниво, со што се овозможува да се идентификуваат потребите, изводливите решенија, како и истите да се применат кога тоа е потребно.

Токму во таа насока, Центарот за развој на Југисточниот плански регион во партнерство со општина Сандански изработи Информативен водич – Збирка на добри практики за справување со последиците од климатските промени во заедниците, во рамки на проектот „Заеднички активности за спречување и намалување на последиците од катастрофи во општините Сандански и Радовиш“ кофинансиран од Европската Унија преку Интеррег-ИПА Програмата за прекугранична соработка помеѓу Република Бугарија и Република Северна Македонија” 2014- 2020.

Во Информативниот водич, потенцирана е важноста на добрите практики и реализирани проекти со различни мерки за прилагодување кон климатските промени и ризици како што се поплава, ерозија, суша итн. Избраните примери за добри практики вклучуваат успешни проекти од Бугарија и од Северна Македонија, како и европски и меѓународни примери за активности за ублажување на последиците од климатски промени и проекти кои се фокусираат на потребата од примена на т.н. зелена инфрастуктура како одржлива мерка за борба против ефектите и спречување на ризиците поврзани со климатските промени.

Преку овој Информативен водич, локалните и регионалните чинители можат да се осврнат на идеи за подобрување на квалитетот на нивните проекти, програми и политики за борба против ефектите од климатските промени и да обезбедат одржлив развој на локалните заедници и региони.

Информативниот водич како двојазичен документ на македонски и англиски јазик во печатена форма е достапен во просториите на Центарот за развој на Југоисточниот плански регион, а во електронска форма на следниот линк: https://www.jointactions.eu/mk/publications.

Зајакнети капацитетите на 4 Дневни центри за лица со телесна или ментална попреченост во Југоисточниот плански регион

Во рамките на проектот „Создавање на услови за поголема социјална инклузија на лицата со посебни потреби во Југоисточниот плански регион“ финансиран од Министерството за локална самоуправа и Швајцарската Агенција за развој и соработка се одржа серија на обуки за работно оспособување и за учење на правилата за спортската параолимписка дисциплина „Бочија“ во 4 Дневни Центри за лица со попреченост во Југоисточниот плански регион.

Во рамките на проектот „Создавање на услови за поголема социјална инклузија на лицата со посебни потреби во Југоисточниот плански регион“ финансиран од Министерството за локална самоуправа и Швајцарската Агенција за развој и соработка се одржа серија на обуки за работно оспособување и за учење на правилата за спортската параолимписка дисциплина „Бочија“ во 4 Дневни Центри за лица со попреченост во Југоисточниот плански регион.

Учесници на обуките беа вработени и волонтери, корисници и родители на корисниците во Дневните центри кои преку теоретски и практичен дел се запознаа со правилата на играње на параолимписката спортска дисциплина Бочија, техники за принтање врз текстил со помош на Сито печат, изработка на рачни украси со разновидни мотиви со помош на Грничарско колце и силиконски модли.

Имено во рамки на проектот, кој го имплементира Центарот за развој на Југоисточниот плански регион, Дневните Центри за лица со попреченост во Валандово, Гевгелија, Радовиш и Струмица се опремени со реквизити и опрема за работна окупација, психомоторен развој и достапност.

Грничарско колце, разбој за ткаење, опрема за спортот Бочија, сито печат за печатење на најразчични теми врз ткаенина и хартија, транспортер за инвалидски колички, трицикли, интерактивни уреди, сунгерасти реквизити и најразлични репроматеријали за изработка на магнетни и глинени украси се само дел од опремата која ги збогатува постоечката образовна програма која ја добиваат корисниците, додека пак со доставените транспортери за пренесување на инвалидски колички во иднина ќе се овозможи непречено учество на овие лица на најразлични настани кои се одвиваат во затворени објекти кои немаат соодветен пристап за лица со телесна попреченост.

Станува збор за проект кој дава придонес во областа на подигање на свеста за вклучување на лицата со различни попречености во општествениот и социјалниот живот во регионот како и подобрување на секојдневниот престој во Дневните Центри.

Набавената опрема и стекнатите знаења ќе овозможат долгорочни промени во начинот на работење со лицата со различни попречености во однос на работно оспособување, зголемување на вклученоста на пазарот на трудот и социјална вклученост на регионално ниво.