Одржана дваесет и петтата (XXV) седница на Советот за развој на Југоисточниот плански регион

На 02.02.2021 година се одржа дваесет и петтата (XXV) седница на Советот за развој на Југоисточниот плански регион, која поради пандемијата Ковид-19, беше одржана онлајн, преку ZOOM платформата. На седницата беа вклучени градоначалниците на општините од регионот и Директорката на Центарот за развој на Југоисточниот плански регион.

На седницата главно се разговараше за начинот на третирање на комарци на териториите на општините во Југоисточниот плански регион за 2021 година. Беше донесена Одлука за взаемна активност на општините за третирање на комарци во 2021 година по земјен пат, врз основа на која ќе се извршат две ларвицидни и три адлутни третирања против комарци, односно три теристички аеросолни дезинсекциии против возрасни комарци со УЛВ метода и две ларвицидни дезинсекции на териториите на десетте општини од регионот.
Оваа Одлука се донесе порано со цел да се запазат роковите и препораките од Центрите за јавно здравје за навремено прскање против комарци и да се следат препорачаните интервали на прскање и третирање за да се зголеми ефикасноста, да се добие најдобар резултат од овој процес и да се заштити здравјето на граѓаните од нашиот регион.

Во исто време се донесе заклучок да се бара од Министерството за транспорт и врски да ја вклучи површината на Моноспитовско блато во локациите кои се приоритетни за прскање против комарци од страна на Министерството како примерот за Дојранското Езеро од нашиот регион. Имено поради недостапноста на теренот нема можност да се изведе теристичка (од земја) аеросолна дезинсекција, а од друга страна оваа блато претставува најголем извор на комарци во овој регион.

На дваесет и петтата седница на Совет на ЈИПР беа донесени и едногласно усвоени и Одлуките за продажба на старото службено моторно возило и за купување на ново службено моторно возило за потребите на Центарот за развој на Југоисточнот плански регион.

На оваа седница беше утврдена и висината на средствата кои секоја од општините од регионот ќе ги одделува на годишно ниво за финансирање и непречено работење на Јавното претпријатие за заловување на бездомни кучиња „Астра – Луна“ – Струмица, за што беше донесена Одлука од страна на Советот.

Усвоени Финансискиот план за работа на ЦРЈИПР и Акциониот план за спроведување на Програмата за рамномерен регионален развој на Југоисточниот плански регион за 2021 година

На 30.12.2020 година поради пандемијата Ковид-19, преку ЗООМ платформата, онлајн се одржа XXIV (дваесет и четвртата) и последна Седница на Советот за развој на Југоисточниот плански регион за 2020 година, на која присуствуваа градоначалниците на општините од регионот и Раководителот на Центарот за развој на Југоисточниот плански регион.

Пред присутните градоначалници, Раководителот на Центарот Г-а Жулиета Ѓуркова ги презентираше Предлог Финансискиот план за работа на Центарот за развој на Југоисточниот плански регион за 2021 година, како и Предлог Акциониот план за 2021 година за спроведување на Програмата за рамномерен регионален развој на Југоисточниот плански регион кои на седницата едногласно беа усвоени.

На оваа Седница исто така беа донесени и едногласно усвоени и одлуките за примопредавање и преотстапување на користење и одржување на локален пат с.Бориево – с.Колешино на општина Босилово и општина Ново Село; Одлуката за примопредавање и преотстапување на користење и одржување на локален патен правец од Клучка со Р 604 пат Струмица – Дојран со клучка П-611 пат Валандово – Гевгелија на општина Дојран и Одлуките за примопредавање и преотстапување на користење и одржување на пат Богородица – Стојаково, крстосница со регионален пат Гевгелија – Богородица прва фаза на општина Богданци и втора фаза на општина Гевгелија.

ИНФОРМАТИВЕН ВОДИЧ – ЗБИРКА НА ДОБРИ ПРАКТИКИ ЗА СПРАВУВАЊЕ СО ПОСЛЕДИЦИТЕ ОД КЛИМАТСКИ ПРОМЕНИ ВО ЗАЕДНИЦИТЕ

Негативните последици настанати како резултат на климатските промени се одвиваат на глобално ниво и се повеќе влијаат врз секојдневниот живот на луѓето.

Размената на добри практики и искуство помеѓу локалните заедници и регионите во различни земји во областа на справување со последиците од климатските промени е клучна за постигнување одржливи резултати, како на локално, така и на регионално и национално ниво, со што се овозможува да се идентификуваат потребите, изводливите решенија, како и истите да се применат кога тоа е потребно.

Токму во таа насока, Центарот за развој на Југисточниот плански регион во партнерство со општина Сандански изработи Информативен водич – Збирка на добри практики за справување со последиците од климатските промени во заедниците, во рамки на проектот „Заеднички активности за спречување и намалување на последиците од катастрофи во општините Сандански и Радовиш“ кофинансиран од Европската Унија преку Интеррег-ИПА Програмата за прекугранична соработка помеѓу Република Бугарија и Република Северна Македонија” 2014- 2020.

Во Информативниот водич, потенцирана е важноста на добрите практики и реализирани проекти со различни мерки за прилагодување кон климатските промени и ризици како што се поплава, ерозија, суша итн. Избраните примери за добри практики вклучуваат успешни проекти од Бугарија и од Северна Македонија, како и европски и меѓународни примери за активности за ублажување на последиците од климатски промени и проекти кои се фокусираат на потребата од примена на т.н. зелена инфрастуктура како одржлива мерка за борба против ефектите и спречување на ризиците поврзани со климатските промени.

Преку овој Информативен водич, локалните и регионалните чинители можат да се осврнат на идеи за подобрување на квалитетот на нивните проекти, програми и политики за борба против ефектите од климатските промени и да обезбедат одржлив развој на локалните заедници и региони.

Информативниот водич како двојазичен документ на македонски и англиски јазик во печатена форма е достапен во просториите на Центарот за развој на Југоисточниот плански регион, а во електронска форма на следниот линк: https://www.jointactions.eu/mk/publications.

Interreg IPA Joint Actions

Зајакнети капацитетите на 4 Дневни центри за лица со телесна или ментална попреченост во Југоисточниот плански регион

Во рамките на проектот „Создавање на услови за поголема социјална инклузија на лицата со посебни потреби во Југоисточниот плански регион“ финансиран од Министерството за локална самоуправа и Швајцарската Агенција за развој и соработка се одржа серија на обуки за работно оспособување и за учење на правилата за спортската параолимписка дисциплина „Бочија“ во 4 Дневни Центри за лица со попреченост во Југоисточниот плански регион.

Учесници на обуките беа вработени и волонтери, корисници и родители на корисниците во Дневните центри кои преку теоретски и практичен дел се запознаа со правилата на играње на параолимписката спортска дисциплина Бочија, техники за принтање врз текстил со помош на Сито печат, изработка на рачни украси со разновидни мотиви со помош на Грничарско колце и силиконски модли.

Имено во рамки на проектот, кој го имплементира Центарот за развој на Југоисточниот плански регион, Дневните Центри за лица со попреченост во Валандово, Гевгелија, Радовиш и Струмица се опремени со реквизити и опрема за работна окупација, психомоторен развој и достапност.

Грничарско колце, разбој за ткаење, опрема за спортот Бочија, сито печат за печатење на најразчични теми врз ткаенина и хартија, транспортер за инвалидски колички, трицикли, интерактивни уреди, сунгерасти реквизити и најразлични репроматеријали за изработка на магнетни и глинени украси се само дел од опремата која ги збогатува постоечката образовна програма која ја добиваат корисниците, додека пак со доставените транспортери за пренесување на инвалидски колички во иднина ќе се овозможи непречено учество на овие лица на најразлични настани кои се одвиваат во затворени објекти кои немаат соодветен пристап за лица со телесна попреченост.

Станува збор за проект кој дава придонес во областа на подигање на свеста за вклучување на лицата со различни попречености во општествениот и социјалниот живот во регионот како и подобрување на секојдневниот престој во Дневните Центри.

Набавената опрема и стекнатите знаења ќе овозможат долгорочни промени во начинот на работење со лицата со различни попречености во однос на работно оспособување, зголемување на вклученоста на пазарот на трудот и социјална вклученост на регионално ниво.

На XXIII Седница на Совет на ЈИПР утврдена годишната листа на приоритетни проекти за 2021 година

На 15.12.2020 година со цел да се запазат мерките за заштита од настаната светска пандемија Ковид-19, онлајн преку електронската платформа ЗООМ се одржа XXIII (дваесет и третата) Седница на Советот за развој на Југоисточниот плански регион.

Пред присутните градоначалници oд страна на форумскиот модератор и надворешен консултант-експерт ангажирани преку проектот „Одржлив инклузивен рамномерен регионален развој“ презентирани беа процесот на рангирањето на предлог проектите од регионално и микрорегионално значење за Југоисточниот плански регион од страна на граѓаните од регионот, а воедно беше презентирана и аналитичка студија за економска исплатливост на капиталните инвестиции поединечно на секој предлог проект.

По краткиот осврт на секој од предлог проектите за време на Седницата, Советот ја усвои Годишната листа на приоритетни проекти за 2021 година согласно следниот редослед:

1. Збогатување на туристичката понуда во Југоисточниот плански регион
2. Изградба на пристапен пат до регионалниот стационар за бездомни кучиња
3. Изградба на Локален пат на релација с.Погулево – с.Дамјан

На резервна листа беше утврден предлог проектот – Имплементација на трета фаза од проектот Изградба на локален пат за поврзување на населените места Бориево и Колешино.

Приоритетната листа се однесува за изведба на проекти кои ќе ја збогатат туристичката понуда во регионот, ќе ја подобрат патната инфраструктура и ќе се овозможи поврзување на локални патишта во регионот преку средства од Бирото за рамномерен регионален развој и сопствено учество на општините од Југоисточниот регион.

Согласно утврдената листа, Центарот за развој на Југоисточниот плански регион ќе аплицира до Бирото за регионален развој за нивно финансирање преку Програмата за рамномерен регионален развој за 2021 година.

Оваа година по прв пат предлог проектите пред да бидат усвоени од Советот за развој на ЈИПР инклузивно и со партиципативно учество беа бодувани и приоретизирани од страна на граѓаните од Југоисточниот плански регион преку Форумски сесии во заедницата како нов начин за избирање проекти за Бирото за регионален разво, коишто форуми поради пандемијата Ковид-19 се одвиваа преку пополнување на прашалник од засегнатите страни од Југоисточниот плански регион.

Втора форумска сесија во рамките на Регионалните форуми на заедницата за 2020 година

Како дел од втората форумска сесија, се спроведе пополнување на е-прашалник со цел приоретизирање на концепти за предлог проекти како предлог решенија произлезени од учесниците на првата форуска сесија, а развиени од страна на експерти во соработка со Центарот за развој на ЈИПР.

Прашалниците беа пополнети од вкупно 62 учесника, претставници од општините, јавна администрација од регионот, бизнис сектор, пензионери, невработени лица и др., од кои 26 (41,9 %) се жени, а 36 (58,1%) се мажи.

По направените анализи и сумираните податоци, концептите за предлог проекти беа рангирани по следниот редослед:

Збогатување на туристичката понуда во Југоисточниот плански регион
Изградба на пристапен пат до регионалниот стационар за бездомни кучиња
Изградба на Локален пат на релација с.Погулево – с.Дамјан
Изградба на Локален пат на релација Колешино – Бориево (трета фаза)
Изградба на Локален патен правец Л603 за поврзување на патниот правец – Стојаково – Ѓавато со крстосницата со регионалниот пат Р1109

Во рамките на Втората форумска сесија на 15.12.2020 година беше одржана и онлајн презентација на резултатите од гласањето како и од аналитичката студија на петте предлог концепти, каде што беа дадени и препораки за нивно подобрување.

Понатаму овие резултати ќе бидат претставени и пред Советот за развој на Југоисточниот регион кој ќе ги земе во предвид при утврдување на конечната листа на приоритени проекти.

Јавниот повик за поднесување на кредитно барање од Фондот за микро и мали претпријатија

Почитувани,

Јавниот повик за поднесување на кредитно барање од Фондот за микро и мали претпријатија за директна поддршка на микро и мали трговски друштва, трговци поединци и занаетчии кои плаќаат данок на реален приход и се регистрирани во Република Северна Македонија односно КОВИД 3 повикот, ќе биде објавен на 16.12.2020 година, аплицирањето започнува од 00:01 часот.

Критериумот за распределба на средствата е по принципот ,,ПРВ ДОЈДЕН, ПРВ УСЛУЖЕН” за кредитокорисници кои ги исполнуваат критериумите за одобрување на кредит.

Јавниот повик е објавен на следниов линк: https://www.mbdp.com.mk/mk/vesti/687-1-7.

За дополнителни информации обратете се кај Данче Поп-Иванова Илиева, тел. 071/364-934, е-маил: dance.popivanova@gmail.com, контакт лице од Центарот за развој на Југоисточниот плански регион.

Претседател на Совет за развој на ЈИПР

Г-н Коста Јаневски

Одржана дваесет и втората (XXII) Седница на Советот за развој на Југоисточниот плански регион

На 07.12.2020 година, се одржа дваесет и втората (XXII) Седница на Советот за развој на Југоисточниот плански регион, он-лајн преку виртуелната платформа Zoom, поради настанатата вонредна состојба на светско ниво COVID 19.

На Седницата присуствуваа Градоначалниците од општините во состав на Југоисточниот плански регион, како и експертот Г-н Тихомир Петрески задолжен за изработка на студија на исплатливост за секој од избраните концепт решенија.

Клучна точка на оваа Седница на Советот за развој на Југоисточниот плански регион беше презентација на предложените концепт решенија, четврти чекор од концептот за регионални форуми на заедницата, алатка за идентификација, приоретизирање и подготовка на проекти за финансирање од Програмата за рамномерен регионален развој за 2021 година, преку Министерство за локална самоуправа и Бирото за регионален развој.

Предложените концепт решенија беа претходно идентификувани, врз основа на избраните приоритетни области и подобласти од спроведената прва форумска сесија, што беше спроведена преку он-лајн прашалник. Понатаму со ангажираниот надворешен експерт, Тихомир Петрески, беа спроведени неколку состаноци со градоначалниците и претставници од општините од Југоисточниот регион врз основа на кои беа идентификувани пет концепт решенија како одговор на идентификуваните проблеми и тоа:

Концепт 1 – Збогатување на туристичката понуда во Југоисточниот плански регион.
Концепт 2 – Изградба на Локален пат на релација Колешино – Бориево (трета фаза).
Концепт 3 – Изградба на Локален пат на релација с.Погулево – с.Дамјан.
Концепт 4 – Изградба на пристапен пат до регионалниот стационар за бездомни кучиња.
Концепт 5 – Изградба на Локален патен правец Л603 за поврзување на патниот правец – Стојаково – Ѓавато со крстосницата со регионалниот пат Р1109.

Советот за развој на Југоисточниот плански регион одлучи сите пет да преминат во следната фаза т.е во фазата на приоритизација која ќе се спроведе по пат на електронски прашалник, како втора форумска сесија преку која населението од регионот ќе има можност да дава забелешки и препораки за нивно подобрување, за на крај Советот за развој на Југоисточниот плански регион ја утврди годишната приоритетна листа на предлог-проекти за финансирање од Програмата за рамномерен регионален развој за 2021 година.

Целиот процес на идентификација на предлог-проектите за финансирање преку Програмата за рамномерен регионален развој за 2021 година се спроведува во рамки на проектот „Одржлив и инклузивен рамномерен регионален развој“, проект на Швајцарската агенција за развој и Министерството за локална самоуправа.

Програмата за развој на Југоисточниот плански регион за наредниот четиригодишен период 2020- 2024 е во крајна фаза на изработка

На ден 02.12.2020 виртуелно на онлајн платформата ЗООМ се одржа Финална Конференција на којашто беше претставена работната нацрт верзија на Програмата за развој на Југоисточниот плански регион 2020-2024. Учество на оваа конференција зедоа Градоначалниците – членови на Советот за развој на Југоисточниот плански регион, претставници на Министерство за локална самоуправа и засегнати страни од Југоисточниот регион (претставници на општини, јавни институции, приватен и граѓански сектор).

Финалната Конференција со воведно обраќање ја отворија Г-н Коста Јаневски, Претстедател на Советот за развој на Југоисточниот плански регион и Г-а Жулиета Ѓуркова, раководител на Центарот за развој на Југоисточниот плански регион.

Г-а Ѓуркова во поздравниот говор истакна дека Програмата за развој на ЈИПР претставува еден од најзначајните документи не само за Центарот туку и за сите општини, граѓански организации како и бизнис секторот во регионот и појасни дека истата ќе биде целосно усогласена со Националната Стратегија за регионален развој, а ќе биде усвоена од страна на Советот на ЈИПР по претходна сосгласност од Советот за рамномерен регионален развој на РСМ.

Од страна на експертскиот тим беше презентирана нацрт верзијата на Програмата за развој на Југоисточниот плански регион 2020-2024, целиот процес на изработка на Програмата, вклученоста и придонесот на засегнатите страни, продуктивноста и работата на изминатите работилници за изработка на Програмата, како и активностите кои се реализираа меѓу сесиите.

Конференцијата заврши со плодна дикусија каде градочалниците од регионот и сите засегнати страни имаа можност за искажување забелешки, сугестии, коментари и пофалби во однос на презентираниот среднорочен документ на Југоисточниот плански регион.

„Програмата за развој на ЈИПР е доста опсежно и темелно направена и во иднина со сите релевантни фактори и засегнати страни ќе се бориме предложените стратешки цели да добијат едно поголемо значење со надеж дека Југоисточниот плански регион ќе добие поголем процент во распределбата на средства за регионите. Сметам дека пред нас има уште многу предизвици, особено во делот на инфраструктура и се надевам дека сите заедно ќе успееме дел од тие предизвици да ги оствариме во наредниот период.“ – истакна на крај Г-н Коста Јаневски Претседател на Советот за развој на Југоисточниот плански регион

Процесот на изготвување на Програмата за развој на Југоисточниот плански регион е поддржан преку проектот „Одржлив и инклузивен рамномерен регионален развој“, кој се спроведува со финансиска поддршка од Министерството за локална самоуправа и Швајцарската Агенција за развој и соработка во Р.С. Македонија.

Одржан тренинг за користење на Командниот Центар изработен во рамките на проектот „ХЕЛП“

Центарот за развој на Југоисточниот плански регион во координација со фирмата „Тринити Системи“ од Скопје организираа тридневен тренинг за користење на Командниот Центар изработен во рамките на проектот „Интегриран оперативен центар за хуманитарна помош – HELP“, ко-финансиран од Европска Унија и Националните Фондови на земјите учеснички преку Интеррег ИПА Програмата за прекугранична соработка помеѓу Грција – Република Северна Македонија 2014-2020.

Тренинзите се одржаа на 2-ри, 11-ти и 12-ти ноември 2020 година и тоа комбинирано, првиот во Струмица на местото каде што е поставен самиот Команден Центар, а другите два онлајн преку ЗООМ платформата.

Целта на овие тренинзи беше да се запознаат сите заинтересирани страни за начинот на функционирање на Командниот центар и за начинот на ракување со опремата поставена во него.

На првиот тренинг детално беше разгледана опремата која е поставена внатре, а беше презентиран и начинот на отварање и затварање на дополнителниот дел од Кабината преку видео презентација. Исто така беше извршен и тренинг за користење на сателитската и радио станицата и обука за користење на алармот. Учесници на овој тренинг беа претставници од Центарот за управување со кризи од Скопје како и од Регионалните Центри од Југоисточниот регион.

На вториот тренинг се изврши презентација на софтверската апликација изработена за потребите на проектот и функционирањето на Командниот Центар. Овој тренинг беше наменет за корисници т.е за претставници од Центарот за управување со кризи и на истиот им беше претставен Софтверот за управување со инциденти, неговите општи и специфични функционалности, а сето тоа беше заокружено и со практична вежба.

Третиот ден од тренингот одржан на 12.11.2020 година беше поделен во три дела. Во првиот дел се одржа обука за администраторите на софтверскиот систем, во вториот дел се организираше пилот акција каде врз основа на поставено сценарио се тестираше функционалноста на системот во реални околности т.е. во услови на поплава. Третиот дел од овој тренинг беше наменет за презентација на Командниот центар пред останатите локални засегнати страни (општини, невладини организации, противпожарна служба, Црвен крст, Дирекција за заштита и спасување) кои исто така треба да го користат во услови на елементарни непогоди при што е потребно да се запознаат со опремата со која располага и како истата се користи.

До крајот на проектот планирано е да се одржат еден инфо ден, на кој пошироката јавност ќе биде запознаена со активностите и резултатите од проектот како и дводневна пилот акција на која ќе бидат претставени и тестирани Командните центри од двете страни на границата и нивната поврзаност помеѓу двата региони пред сите засегнати страни.

Одржана дваесет и петтата (XXV) седница на Советот за развој на Југоисточниот плански регион