Успешно го одбележавме „Денот на регионот“!

На 03.12.2024 година, во Градската галерија во Струмица, се одржа настанот „Ден на Југоисточниот плански регион,“ организиран од Центарот за развој на Југоисточниот плански регион, во рамките на проектот „Одржлив и инклузивен рамномерен регионален развој – 2 фаза,“ финансиски поддржан од Министерството за локална самоуправа и Швајцарската агенција за соработка и развој.
Се разговараше за најдоброто од регионот – иновации, идеи и визии за иднината.
Настанот беше платформа за претставување на достигнувањата и потенцијалите на регионот, привлекувајќи широк спектар на учесници, вклучувајќи претставници од локалните власти, академската заедница, граѓанскиот сектор и приватниот сектор. Во текот на денот, учесниците имаа можност да се запознаат со новата Комуникациска стратегија за промоција на регионот, која ќе придонесе за подобра соработка со заедницата и зголемена видливост на регионалните иницијативи.
Во рамките на настанот беа одржани инспиративни панел-дискусии кои опфатија клучни теми за развојот на регионот, како што се улогата на општините како столб на регионалниот напредок, имплементацијата на зелени практики и циркуларна економија како двигатели на одржливоста, како и можностите за развој преку туризмот и зачувувањето на културното наследство.
Посебен момент беше видео – презентацијата на Југоисточниот регион која ја истакна динамиката на развојот и идниот потенцијал на регионот, инспирирајќи ги присутните да размислуваат за нови можности за соработка.
Настанот заврши со неформално вмрежување и коктел, каде учесниците ги споделија своите идеи за идни соработки. Со нетрпение очекуваме да ги видиме резултатите од оваа иницијатива и да го следиме патот на нашиот регион кон подобра иднина!

Југоисточниот плански регион кон енергетска независност со нови фотонапонски централи

Центарот за развој на Југоисточниот плански регион, успешно го реализираше проектот „Енергетски ефикасен регион“ за изградба на фотонапонски централи за општините Радовиш, Конче и Василево, за што на 22.11.2024 година одржа и промотивен настан. На настанот присуствуваа Министерот за локална самоуправа, Г. Златко Перински, Градоначалниците на општините вклучени во проектот, претставници од Министерството и проектната канцеларија, како и други гости.

Министерот Пирински истакна дека ова е многу значаен проект, не само заради намалувањето на потрошувачката на електрична енергија, туку и заради долгорочната енергетска сигурност и зачувување на природната околина. „Тој претставува одличен пример за меѓуопштинска соработка, што може да се примени и во други региони, овозможувајќи подобрување на квалитетот на живот и поддршка за економскиот раст“, посочи Перински.

Директорот на Центарот, Ѓоко Камчев, додаде дека овој проект претставува значаен чекор кон создавање на енергетски независен регион. „Проектот е фокусиран на интеграција на нови софтверски решенија за користење и производство на електрична енергија од алтернативни извори. Дополнително, предвидено е ефикасно следење и пренасочување на произведената енергија каде што е најпотребна во даден момент. Со ова Југоисточниот плански регион поставува пример за тоа како регионите треба да се движат кон одржлив развој,“ истакна Камчев.

Фотонапонските централи ќе придонесат за значително намалување на трошоците за електрична енергија во трите општини. Произведената енергија ќе биде распределена по следниот принцип: 25% за општините Конче и Василево, додека 50% ќе припаѓа на Општина Радовиш. Овие заштеди ќе овозможат општините да ги насочат средствата кон други развојни приоритети, како што се подобрување на образованието и инфраструктурата.

Вкупната инвестиција во проектот изнесува околу 23 милиони денари, со финансиска поддршка од Министерството за локална самоуправа и Швајцарската развојна агенција, како и учество на трите општини.

Проектот е реализиран во рамките на грантовата шема на проектот „Одржлив и инклузивен рамномерен регионален развој – втора фаза.“ Со ваквите иницијативи, Центарот за развој на Југоисточниот плански регион продолжува да го унапредува квалитетот на животот и да создава услови за одржлив развој во регионот.

Партнерите на проектот SEBCoVE одржаа настан во Скопје

Проектниот тим на ЦРЈИПР по проектот SEBCoVE беше дел од одбележувањето на 20-годишниот јубилеј на Сојузот на стопански комори, каде во рамките на истиот се одржа настанот „Трипартитна соработка за знаење во зелена и дигитална транзиција“. Преку три сесии, учесниците дискутираа за придобивките од изградба на паметни згради како нов чекор кон воведување на иновативни решенија во рамките на зелената економија во нашата земја.

На настанот беа презентирани клучните активности и очекуваните резултати од проектот SEBCoVE, со посебен фокус на потребата од развивање специјализирани курсеви и обуки за паметна електрична енергија. Преку дискусиите се идентификуваа потребите на индустријата и начините на усогласување на тековните образовни програми со овие нови трендови. Во таа насока, беше истакната иницијативата за отворање на Центар за едукација за паметни технологии во рамките на Центарот за развој на Југоисточниот плански регион (ЈИПР).

Настанот го збогатија високи претставници од бизнис секторот и институциите, меѓу кои и претседателот на Сојузот на стопански комори, Трајан Ангеловски, потпретседателите Орце Симов, Горан Ѓоргиевски и Драган Пехчевски, како и Александар Николовски, заменик премиер и министер за градежништво и транспорт, кој им се обрати на присутните, истакнувајќи ја важноста на ваквите иницијативи за економскиот развој на земјата.

SEBCoVE продолжува со својата мисија за унапредување на знаењето и иновациите во зелената и дигиталната транзиција, создавајќи нови можности за стручно усовршување и применлива едукација во оваа област.

ЦРЈИПР ОРГАНИЗИРАШЕ РАБОТИЛНИЦА НА ТЕМА „РАЗВОЈ НА СОЦИЈАЛНИТЕ УСЛУГИ ВО ПЛАНСКИТЕ РЕГИОНИ“

На 5-ти ноември 2024 година, во хотел „Сириус“, беше одржана работилница на тема „Развој на социјални услуги во планските региони“, организирана од Центарот за развој на Југоисточниот плански регион, во рамките на проектот „Одржлив и инклузивен рамномерен регионален развој – фаза 2“.

На настанот учествуваа претставници од сите десет општини од Југоисточниот регион, активни во областа на социјалната заштита, како и директорите на Центрите за социјална работа, претставници на Црвениот крст и невладини организации.

 

Во своето обраќање, Г-н Ристо Манчев, Претседател на Советот за социјална заштита на Југоисточниот регион, ја истакна важноста на развојот на мрежа на социјални услуги што ќе ги задоволат потребите на граѓаните и ќе поттикнат инклузивен и одржлив развој. „Важно е да ги препознаеме специфичните потреби на различни групи – од деца и младинци, преку лица со попреченост, до постарите генерации,“ додаде тој.

Учесниците дадоа активен придонес преку работа во групи и решавање на практични задачи, создавајќи продуктивна работна атмосфера.

Југоисточниот плански регион со прва сеопфатна техничка документација за поставување брзи полначи за електрични возила

Со поддршка од проектот „Јакнење на општинските капацитети за имплементација на проекти“, Југоисточниот плански регион изработи сеопфатна техничка документација за поставување на брзи полначи за електрични возила. Документацијата опфаќа 20 одделни проекти за сите 10 општини во регионот – Струмица, Радовиш, Василево, Конче, Гевгелија, Валандово, Дојран, Богданци, Босилово и Ново Село.
Ова е првиот сеопфатен проект од ваков вид во регионот и во државата, соопштуваат од Центарот за развој на Југоисточниот плански регион. Документацијата ќе послужи како основа за обезбедување на инвестиции за одржливи транспортни решенија на територијата на овие општини.
„Нашата следна цел е, преку координирани напори со општините и надлежните државни институции, да обезбедиме потребни финансиски средства за постепена изградба на е-полначите на предвидените локации. Поставувањето на овие брзи полначи од 150 kw и можност за нивно проширување до 220 kw, ќе отвори нови можности за развој на туризмот во Југоисточниот плански регион, привлекувајќи поголем број туристи кои користат електрични возила. Дополнително, оваа инфраструктура ќе игра значајна улога во намалување на загадувањето, подобрување на квалитетот на живот и зголемување на употребата на чиста енергија, што ќе придонесе кон еколошки и економски напредок на регионот“ – изјави г-нот Ѓоко Камчев, Директор на Центарот за развој на Југоисточниот плански регион.
Проектот „Е-полначи за електрични возила: техничка документација“ е реализиран со поддршка од Фондот за техничка документација. Овој фонд е воспоставен како инструмент за финансиска и техничка поддршка во управувањето со инфраструктурни проекти, како дел од проектот на УНДП (UNDP MK)„Јакнење на општинските капацитети за имплементација на проекти“, кој се спроведува во партнерство со Министерство за локална самоуправа, преку финансиска поддршка обезбедена од Шведска (Embassy of Sweden in Skopje) и Бирото за регионален развој. Дел од финансиските средства беа обезбедени и од општините во Југоисточниот регион.

Министерот за локална самоуправа во посета на Југоисточниот регион

Министерот за локална самоуправа, Златко Перински, заедно со директорот на Бирото за регионален развој, Даут Мемиши, ги посетија локациите на кои што се имплементирани проектни активности во рамките на два проекти финансирани преку Програмата за рамномерен регионален развој, со цел да направат увид во постигнатите резултати.

Во рамките на проектот „Југоисточниот регион – можност за нови туристички авантури“, дел од активностите вклучуваат реконструкција и поставување на нова урбана опрема на Смоларските водопади и излетничкиот локалитет Пирго кај Мокриево, во општина Ново Село преку изградба на нови пешачки патеки, санација на дрвените огради и поставување нов пешачки мост пред водопадите. На Пирго се изградени нови летниковци, проширен е капацитетот на постојниот амфитеатар, поставени се детско катче и ново одбојкарско игралиште на песок.Continue reading

Трипартитна соработка за знаење во зелена и дигитална транзиција – SEBCoVE

На ден 27.08.2024 година, во хотел „Ла Тераца“ во Дојран, се одржа значајниот настан „Трипартитна соработка за знаење во зелена и дигитална транзиција“, организиран во рамки на проектот SEBCoVE – Smart Electricity for Buildings, финансиран од Европската комисија. Настанот беше организиран од страна на партнерите на проектот: Центар за развој на Југоисточниот плански регион, Сојуз на стопански комори на Македонија и Емкице КИЦ.
На настанот присуствуваа високи претставници од јавниот и приватниот сектор, вклучувајќи го министерот за дигитална трансформација, министерот за локална самоуправа и министерот за јавна администрација на Република Македонија и градоначалници од регионот. Исто така присутни беа и претставници на амбасади во Р.Македонија, како и претставничка од Европската Комисија и Евроамбасадта. Свои обраќања имаа и експерти од Tesla Science Center во Њујорк, како и престижни професори и истражувачи од различни универзитети и институти од Европа и САД.
Во рамки на три панел-дискусии, учесниците имаа можност да разменат мислења и искуства за идните активности на SEBCoVE проектот, дигитализацијата, иновациите во паметните градови и села, како и трендовите во политиките за зелена и дигитална трансформација за локален и регионален економски развој.
SEBCoVE проектот, кој ќе се имплементира во следните три години во седум европски земји, вклучуваjќи ги Македонија, Грција, Португалија, Шпанија, Италија, Холандија и Германија, со вкупен буџет од 3 милиони евра. Целта на овој проект е да ги поддржи дигиталната трансформација и енергетската ефикасност во јавните објекти, преку соработка на некои од најдобрите експерти и организации во Европа. 💡
Настанот продолжува и утре, каде што присутните ќе го продолжат своето патување низ убавините на Југоисточниот регион со неформална размена на идеи и градење на нови партнерства.

Трето прскање против возрасни комарци во Југоисточниот плански регион

Се известуваат граѓаните од општините во Југоисточниот регион, дека на 13-ти, 14-ти и 15-ти Август 2024 година, во периодот од 20.00 до полноќ ќе се врши теристична дезинсекција против возрасни комарци и тоа во следниве општини:

  • 13 Август (Вторник) во општина Радовиш;
  • 14 Август (Среда) во општините Дојран и Валандово;
  • 15 Август (Четврток) во општините Струмица, Василево, Босилово и Ново Село.

Доколку временските услови се неповолни, дезинсекцијата ќе се изврши кога временските услови ќе бидат подобрени.

Се известуваат сопствениците на пчелни семејства да преземат соодветни мерки за заштита, односно да ги затворат истите во најавениот временски период.

Второ прскање против возрасни комарци во Југоисточниот плански регион

Се известуваат граѓаните од општините во Југоисточниот регион, дека на 10-ти и 11-ти Јули 2024 година, во периодот од 20.00 до полноќ ќе се врши теристична дезинсекција против возрасни комарци и тоа во следниве општини:

  • 10 Јули (Среда) во општините  Конче, Валандово и Дојран;
  • 11 Јули (Четврток) во општините Ново Село, Босилово, Василево и Струмица;

Доколку временските услови се неповолни, дезинсекцијата ќе се изврши кога временските услови ќе бидат подобрени.

Се известуваат сопствениците на пчелни семејства да преземат соодветни мерки за заштита, односно да ги затворат истите во најавениот временски период.

ТРЕТА ЛАРВИЦИДНА ДЕЗИНСЕКЦИЈА ВО ЈУГОИСТОЧНИОТ РЕГИОН

Се известуваат граѓаните од општините во Југоисточниот регион, дека на 03 Јули 2024 година, во периодот од 09.00 до 16.00 часот ќе се врши ларвицидна дезинсекција и тоа во следниве општини:

  • 03 Јули ( Среда) во општините Ново Село, Босилово, Василево, Струмица, Валандово и Дојран;

Доколку временските услови се неповолни, дезинсекцијата ќе се изврши кога временските услови ќе бидат подобрени.

Се известуваат сопствениците на пчелни семејства да преземат соодветни мерки за заштита, односно да ги затворат истите во најавениот временски период.